Read Iban Masmur 51 Bible Online

Masmur 51 - Iban bible

Masmur 51

¹[90] Kasihka aku, O Allah Taala, laban pengerindu Nuan endang meruan. Laban pengasih Nuan endang besai, buai meh dosa aku!

²Buai abis semua penyai aku lalu tuchi aku ari dosa aku!

³Aku ngelala penyalah diri. Aku endang seruran nemu dosa diri.

⁴ Aku udah bedosa ngelaban Nuan - ngelaban Nuan siku aja, lalu udah ngereja utai ti dikumbai Nuan jai. Nya alai Nuan endang sigi ngereja utai ti ngena lebuh Nuan ngakim aku. Nuan endang patut ngukum aku.

⁵Aku endang jai kenyau ari ada. Kenyau ari maya aku dikandungka, aku endang bedosa.

⁶Nuan begunaka pemendar enggau ati ti lurus, nya alai isi meh runding aku enggau penemu-dalam ti datai ari Nuan.

⁷Buai dosa aku, lalu aku deka nyadi tuchi. Basu aku, lalu aku deka nyadi burak agi ari seleju.

⁸Asuh aku ninga munyi pengaga enggau pengelantang, lalu taja pen Nuan udah ngalah lalu ngeredakka aku, aku deka nyadi lantang baru.

⁹Ampun meh dosa aku lalu buai abis semua penyai aku.

¹⁰Gaga ati aku tuchi, O Allah Taala, lalu simpan roh ti baru sereta taluk, dalam aku.

¹¹Anang muai aku ari mua Nuan. Anang ngambi Roh Kudus Nuan ari aku.

¹²Pulaika aku baru ngagai pengaga ti datai ari pengelepas Nuan, lalu asuh aku rajin ngasika Nuan.

¹³Nya baru aku deka ngajar pasal pesan Nuan ngagai orang ke bedosa, lalu sida deka pulai baru ngagai Nuan.

¹⁴Anang munuh aku, O Allah Taala, lalu selamatka aku,[91] lalu aku deka gaga ati madahka pengelepas ti diberi Nuan.

¹⁵Tulung aku bejaku, O TUHAN, lalu aku deka muji Nuan.

¹⁶Nuan enda rinduka piring, nya kebuah aku enda ngenjuk sida ngagai Nuan. Nuan enda rinduka piring tunu.

¹⁷Piring aku nya ati ti baruh, O Allah Taala. Nuan enggai nulak ati ti baruh, ati ti nesal.

¹⁸O Allah Taala, kasihka Sion, lalu tulung iya. Gaga baru meh dinding kuta Jerusalem.

¹⁹Nya baru Nuan deka gaga ati ke piring ti menyana enggau piring tunu. Lalu sapi ti lelaki deka diberi nyadika piring ba alta Nuan.