Read Iban Masmur 52 Bible Online

Masmur 52 - Iban bible

Masmur 52

¹[92] Nama kebuah nuan temegah bejakuka penyai diri, nuan ke kering? Penetap ati Allah Taala endang meruan belama iya.

²Nuan ngaga pelan kena ngerusak orang bukai. Dilah nuan tajam baka lungga. Nuan endang seruran nempa pemula.

³Nuan rinduka penyai lebih agi ari pemanah, lalu rinduka pemula lebih agi ari pemendar.

⁴Nuan rindu ngemediska orang ngena jaku nuan, nuan ke pemula!

⁵Nya alai Allah Taala deka ngerusak nuan belama iya. Iya deka nangkap nuan, lalu nabanka nuan ari rumah nuan. Iya deka muai nuan ari dunya orang ke idup.

⁶Orang ke lurus deka meda nya, lalu takut. Udah nya sida deka ketawaka nuan, lalu bejaku,

⁷“Peda: tu siku orang ke enda minta diri dilindung Allah Taala, tang bekering ba pengaya lalu belindung ba pemayuh pemisi iya.”

⁸Tang aku tu baka kayu kana ti tumbuh dalam rumah Allah Taala. Aku manggaika diri ba pengerindu Iya ti meruan belama iya.

⁹Aku deka seruran meri terima kasih ngagai Nuan, O Allah Taala, ketegal utai ti udah dikereja Nuan. Di mua bala nembiak Nuan, aku deka madahka pemadas Nuan.