Read Iban Masmur 55 Bible Online

Masmur 55 - Iban bible

Masmur 55

¹[95] Dingaka sampi aku, O Allah Taala. Anang nulak peminta aku!

²Pendingka aku, lalu saut aku. Aku nyau lelak laban ati ti irau.

³Aku balat takut diemba bala munsuh aku, alah ditekanka orang ke jai. Sida ngasuh penusah ninggang aku. Sida pedis ati sereta begedika aku.

⁴Aku balat takut, lalu penakut aku ke pemati nyau kelalu berat ba ati aku.

⁵Aku takut, lalu getar-getar. Aku alah laban penakut.

⁶Naka meh pemanah enti aku bisi sayap baka burung achang. Aku tetap deka terebai kebukai lalu belelak.

⁷Aku deka terebai jauh lalu diau di menua puang.

⁸Aku deka beguai-guai ngiga endur alai belindung ari ribut ti deras enggau ari kabut.

⁹Anang nyagi munsuh aku meretika jaku pangan diri, O TUHAN! Aku meda pengachau nyadi dalam nengeri nya,

¹⁰ngelingi iya siang malam, ngisi iya enggau pengawa ti salah sereta enggau penusah.

¹¹Pengerusak nyadi di semua endur. Jalai raya nyau penuh laban orang ke nekanka pengidup orang bukai, sereta nipu pangan diri.

¹²Enti sema munsuh beduan aku, aku ulih natka nya. Enti sema munsuh temegah madahka diri udah ngalahka aku, aku ulih belalai ari iya.

¹³Tang nuan tu pangan aku, sulu aku, pangan rapat aku.

¹⁴Tua udah suah berandau enggau pangan diri lalu sama nyembah Allah Taala dalam Rumah Sembiang.

¹⁵Awakka bala munsuh aku mati pandak umur. Awakka sida nurun idup-idup ngagai dunya pemati! Penyai endang bisi dalam rumah sida enggau dalam ati sida.

¹⁶Tang aku ngangauka TUHAN Allah Taala minta tulung, lalu Iya deka ngidupka aku.

¹⁷Lebuh pagi hari, tengah hari, enggau malam jaku putap enggau demuh aku niki ngagai Iya, lalu Iya deka ninga nyawa aku.

¹⁸Iya deka mai aku pulai baru enggau likun ari endur alai aku ke beperang ngelaban munsuh ke udu mayuh.

¹⁹Allah Taala, ke endang seruran merintah, deka ninga aku, lalu ngalahka sida, laban sida enggai berubah, lalu sida enda nangika Iya.

²⁰Pangan aku ke dulu menya ngamuk bala pangan iya. Iya bulaka semaya diri.

²¹Jaku iya manis, tang ati iya penuh laban pemenchi. Jaku iya alus, tang nyayat baka pedang ti tajam.

²²Serahka penusah nuan ngagai TUHAN, lalu Iya deka nyaga nuan. Iya nadai kala nejuka orang ke lurus alah.

²³Tang Nuan, O Allah Taala, deka muai orang ke pemunuh, enggau orang ke bula ngagai kubur sebedau sida datai setengan umur. Tang aku deka manggaika pengarap aku ba Nuan.