Read Iban Masmur 56 Bible Online

Masmur 56 - Iban bible

Masmur 56

¹[96] Kasihka aku, O Allah Taala, laban aku kena serang. Bala munsuh aku seruran merinsaka aku.

²Bala munsuh aku nyerang aku sepemanjai hari. Mayuh amat sida ngelaban aku.

³Lebuh aku takut, O TUHAN ti Pemadu Bekuasa, aku manggaika pengarap aku ba Nuan.

⁴Aku manggaika pengarap aku ba Allah Taala, lalu aku enda takut. Aku muji semaya Iya. Nama utai ti ulih dikereja mensia ngagai aku?

⁵Bala munsuh aku ngachau aku sepemanjai hari. Sida seruran berundingka chara kena ngemediska aku!

⁶Sida begempuru ba endur alai sida belalai lalu nengkilaka semua utai ti dikereja aku, ngarapka diri ulih munuh aku.

⁷Ukum[97] meh sida nya, O Allah Taala, ketegal penyai ti dikereja sida. Awakka Nuan ringat lalu ngalahka bala orang nya.

⁸Nuan nemu pemalat ati aku tusah. Nuan nemu pemayuh ai mata aku labuh. Ukai enda semua ai mata aku nya udah dituliska Nuan magang dalam bup Nuan?

⁹Lebuh aku ngangauka Nuan, bala munsuh aku deka nyurutka diri. Aku nemu nya laban Allah Taala[98] setanah enggau aku,

¹⁰iya nya TUHAN ti bempu semaya ti dipuji aku.

¹¹Aku manggaika pengarap aku ba TUHAN, lalu aku enda takut. Nama utai ti ulih dikereja mensia ngagai aku?

¹²O Allah Taala, aku deka meri Nuan utai ti udah disemaya aku. Aku deka meri Nuan piring terima kasih aku,

¹³laban Nuan udah ngelepaska semengat aku ari pemati, lalu udah nagang aku alah. Nya alai aku bejalai di mua Allah Taala, dalam penampak ti manchar ngagai orang ke idup.