Read Iban Masmur 57 Bible Online

Masmur 57 - Iban bible

Masmur 57

¹[99] Kasihka aku, O Allah Taala, kasihka aku, laban aku belindung ba Nuan. Aku diau likun di baruh sayap Nuan nyentuk ngagai maya biaubalai nyau teduh.

²Aku ngangauka Allah Taala ti Pemadu Tinggi, Allah Taala ti meri semua utai ti dipeguna aku.

³Iya deka nyaut aku ari serega lalu ngelepaska aku. Iya deka ngalahka orang ke nekanka pengidup aku. Allah Taala deka ngayanka pengerindu Iya ti meruan belama iya, enggau penetap ati Iya.

⁴Aku dikelulung munsuh ke baka jelu singa ti lapar deka makai mensia. Ngeli sida baka sangkuh enggau laja. Dilah sida baka pedang ti tajam.

⁵Ayanka pemesai kuasa Nuan di langit, O Allah Taala, lalu ayanka mulia Nuan di serata dunya.

⁶Bala munsuh aku udah mintarka pukat kena sida nangkap aku. Ati aku balat tusah. Sida udah numbak lubang kebung ba jalai ti ditengah aku, tang sida empu udah labuh ngagai lubang kebung nya.

⁷Aku nadai irau mimit, O Allah Taala. Aku deka belagu muji Nuan!

⁸Dani meh nuan, O semengat aku! Dani meh kita belikan enggau engkeratung aku! Aku deka ngerak mata hari.

⁹Aku deka meri terima kasih ngagai Nuan, O TUHAN, di mua semua bansa bukai. Aku deka muji Nuan di mua semua bansa.

¹⁰Pengerindu Nuan ti meruan belama iya tinggi nyentuk ke langit. Penetap ati Nuan ngeninggi remang.

¹¹Ayanka pemesai kuasa Nuan di langit, O Allah Taala, lalu ayanka mulia Nuan di serata dunya.