Read Iban Masmur 59 Bible Online

Masmur 59 - Iban bible

Masmur 59

¹[104] Selamatka aku ari bala munsuh aku, O Allah Taala aku. Jaga aku ari orang ke nyerang aku!

²Selamatka aku ari bala orang ke jai nya. Selamatka aku ari bala pemunuh nya!

³Peda sida ngipa deka munuh aku. Orang ke jai nya begempuru deka ngelaban aku. Sida beguai-guai mansang ngambi endur diri

⁴ukai ketegal dosa tauka penyalah aku, O TUHAN.

⁵Angkat meh Nuan, TUHAN Allah Taala ti Pemadu Bekuasa, lalu tulung aku. O Allah Taala ke disembah orang Israel, awakka Nuan Empu meda! Angkat, lalu ukum meh semua bansa orang kapir nya. Anang kasihka orang ke jai, ke nyual bansa diri!

⁶Lebuh hari nyau lemai sida datai baru, ngengar baka ukui lebuh sida segau-segau bejalai ba sebelah nengeri.

⁷Pendingka jaku pechat enggau jaku emba sida. Dilah sida baka pedang dalam nyawa sida, tang sida ngumbai orang nadai ninga sida.

⁸Tang Nuan ketawaka sida, O TUHAN. Nuan ngeleseka semua bansa orang kapir.

⁹Aku andal ati ke pengering Nuan. Nuan meh nyadika kuta aku, O Allah Taala.

¹⁰Allah Taala rinduka aku, lalu Iya deka datai ngagai aku. Iya deka ngasuh aku meda bala munsuh aku alah.

¹¹Anang munuh sida, O Allah Taala, enggai ke bala nembiak aku enda ingat. Pambarka sida ngena pengering Nuan, lalu alahka sida, O TUHAN, ti nyadi terabai kami.

¹²Dosa mengkang ba ujung mulut sida. Semua utai ti disebut sida endang dosa magang. Awakka sida ditangkap ketegal penyumbung sida! Laban sida nyumpah sereta bula,

¹³rusak meh sida ngena pengeringat Nuan. Rusak meh sida abis lengis. Nya baru semua orang deka nemu Allah Taala endang amat merintah Israel, lalu perintah Iya ngerembai di serata dunya.

¹⁴Lebuh hari nyau lemai sida datai baru, ngengar baka ukui lebuh sida segau-segau bejalai ba sebelah nengeri,

¹⁵baka ukui ti segau-segau ngiga pemakai lalu ngengar enti sida nadai tetemuka pemakai ti chukup.

¹⁶Tang aku deka belagu ngenang pengering Nuan. Tiap pagi aku deka belagu enggau nyawa ti inggar ngenang pengerindu Nuan ti meruan belama iya. Laban Nuan nyadika kuta aku, alai aku belindung lebuh penusah nuntung.

¹⁷Aku deka muji Nuan ke penyaga aku. Aku belindung ba Allah Taala ti rinduka aku.