Read Iban Masmur 60 Bible Online

Masmur 60 - Iban bible

Masmur 60

¹[105] Nuan udah nulak lalu ngalahka kami, O Allah Taala. Nuan udah ringat ngagai kami, tang pulai meh Nuan baru ngagai kami.[106]

²Nuan udah ngasuh tanah berenyang, lalu Nuan udah merekahka tanah. Geraika tanah nya diatu, laban iya nyau deka tebererak.

³Nuan udah ngasuh bala nembiak Nuan balat amat merinsa. Kami nyau guir-guir bejalai baka ke mabuk.

⁴Nuan udah meri jaku tangkan ngagai orang ke nangika Nuan, ngambika sida ulih ngerarika diri ari pengerusak.

⁵Lepaska kami ngena pengering Nuan. Saut sampi kami, ngambika orang ke dikerinduka Nuan dilepaska.

⁶Ari Endur Iya ti Kudus[107] Allah Taala udah besemaya, “Aku deka menang lalu bedua menua Sekem lalu meri Lebak Sukot ngagai bala nembiak Aku.

⁷Giliat endang enggi Aku, Manasi mega enggi Aku. Epraim nya selapuk kebal Aku lalu Judah nya tungkat diraja Aku.

⁸Tang Aku deka ngena Moap nyadika dulang alai Aku bebasu, lalu Aku deka nikauka kasut Aku ngagai Edom, nyadika kelai Aku bempu menua nya. Kati orang Pilistin ngumbai diri deka manjung menang ngelaban Aku?”

⁹O Allah Taala, sapa deka mai aku ngagai nengeri ti bekuta nya? Sapa deka nguluka aku ngagai Edom?

¹⁰Kati Nuan amat udah nulak kami? Kati Nuan enggai bejalai enggau bala soldadu kami?

¹¹Tulung meh kami ngelaban munsuh. Tulung ari mensia endang nadai reti.

¹²Enti Allah Taala setanah enggau kitai, kitai deka menang. Iya deka ngalahka bala munsuh kitai.