Read Iban Masmur 62 Bible Online

Masmur 62 - Iban bible

Masmur 62

¹[109] Aku deka liat ati nganti Allah Taala; laban pengelepas aku datai ari Iya.

²Semina Iya siku aja ke nyaga sereta ngelepaska aku. Iya kuta aku, lalu aku enda alah.

³Ni pengelama semua kita agi nyerang orang ke lemi baka pagar ti udah runtuh?

⁴Kita semina deka ngasuh iya labuh ari endur iya ti tinggi. Kita rindu bula. Kita merekatka iya ngena mulut kita, tang kita nyumpah iya dalam ati kita.

⁵Aku manggaika diri semina ba Allah Taala siku aja, laban pengadang aku datai ari Iya.

⁶Ka semina Iya siku aja ke nyaga sereta ngelepaska aku. Iya kuta aku, lalu aku enda alah.

⁷Pengelepas enggau basa aku dipanggaika ba Allah Taala. Iya kuta aku ti tegap. Aku belindung ba Allah Taala.

⁸Panggaika pengarap kita berari ba Allah Taala, kita ke nembiak aku. Padahka ngagai Iya semua penusah kita, laban kitai belindung ba Iya.

⁹Semua mensia sigi baka kesuh seput. Tinggi tauka baruh pangkat, semua sida endang nadai guna magang. Enti sida ditimbang, sida nadai pemerat. Sida lempung agi ari kesuh seput.

¹⁰Anang manggaika diri ba pemangah. Anang ngarapka diri deka bulih utai ari pengawa ngerumpak. Enti sema pengaya kita nambah-menambah, anang meh kita bekering ba pengaya nya.

¹¹Aku suah udah ninga Allah Taala madahka kuasa endang enggi Iya

¹² lalu pengerindu Iya meruan belama. Nuan Empu, O TUHAN, ngupah genap iku orang nitihka utai ti dikereja iya.