Read Iban Masmur 63 Bible Online

Masmur 63 - Iban bible

Masmur 63

¹[110] O Allah Taala, Nuan endang Allah Taala aku, lalu aku lelengauka Nuan. Aku aus ke Nuan. Semengat aku aus ke Nuan baka menua ti rangkai, kusi, ransi nadai ai.

²Awakka aku meda Nuan dalam Endur Nuan Ti Kudus. Awakka aku meda kuasa enggau mulia Nuan.

³Pengerindu Nuan ti meruan belama iya, endang manah agi ari pengidup. Nya alai aku deka muji Nuan.

⁴Aku deka muji Nuan seagi aku idup. Aku deka ngangkatka jari besampi ngagai Nuan.

⁵Semengat aku deka diberi makai besai lalu kenyang, lalu aku deka belagu pantun gaga ati muji Nuan.

⁶Lebuh aku gali, aku ngingatka Nuan. Semalam-malam aku berundingka Nuan,

⁷laban Nuan endang seruran nulung aku. Aku belagu gaga ati belindung di baruh sayap Nuan.

⁸Aku empakap ba Nuan, lalu jari nuan meri aku pengelikun.

⁹Orang ke nguji munuh aku deka nurun ngagai dunya pemati.

¹⁰Sida deka mati beperang, lalu bangkai sida deka diempa ukui kampung.

¹¹Raja deka rami gaga laban Allah Taala meri iya pemenang. Orang ke ngaga semaya dalam nama Allah Taala, deka muji Iya, tang mulut orang ke bula, deka ditutup.