Read Iban Masmur 64 Bible Online

Masmur 64 - Iban bible

Masmur 64

¹[111] Aku kena laban penusah, O Allah Taala, pendingka sampi aku! Aku takutka bala munsuh aku, selamatka aku!

²Jaga aku ari akal orang ke jai, ari bala orang ke jai.

³Sida ngansah dilah sida baka pedang lalu ngesuhka jaku ti jai baka laja.

⁴Enggau nadai pemalu mimit sida jampat ngelekaika pemula sida lalu ngerusak orang ke manah ngena jaku petenah sida.

⁵Sida meransang pangan diri lebuh sida bepekat deka ngereja penyai. Sida berandauka endur alai sida deka nan panjuk sida. Ku sida bejaku, “Nadai orang ulih meda panjuk nya.”

⁶Sida ngaga pelan ti jai, lalu ku sida, “Kitai udah ngaga pelan kena ngereja penyalah ti enda ulih dipansik.” Ati enggau runding mensia endang enda ulih disagam.

⁷Tang Allah Taala nimbakka laja Iya ngagai sida, lalu tekala nya sida bakal.

⁸Iya deka ngerusak sida ketegal jaku nya.[112] Semua orang ke meda sida, bela ngilikka pala.

⁹Semua sida deka takut magang. Sida deka berundingka utai ti udah dikereja Allah Taala lalu nusui utai ti udah dikereja Iya.

¹⁰Semua orang ke lurus deka rami gaga ketegal utai ti udah dikereja TUHAN. Sida deka diau likun dalam Iya. Semua orang ke badas deka muji Iya.