Read Iban Masmur 68 Bible Online

Masmur 68 - Iban bible

Masmur 68

¹[117] Allah Taala angkat lalu ngachirka bala munsuh Iya. Orang ke begedika Iya, rari alah.

²Sida diburu Iya baka asap ti dikebuka ribut. Baka lilin ti lela dipandang api, baka nya meh orang ke jai mati di mua Allah Taala.

³Tang orang ke lurus deka lantang sereta rami gaga di mua Iya. Sida lantang sereta manjung gaga ati.

⁴Belagu meh kita ke Allah Taala, belagu meh kita muji nama Iya. Sediaka jalai ke Iya ti nepan ba atas mua hari.[118] Nama Iya TUHAN. Awakka kita gaga di mua Iya!

⁵Allah Taala, ti diau dalam Rumah kudus Iya, ngibun orang ke nadai apai indai, lalu nyaga sida indu ke balu.

⁶Iya meri rumah ngagai orang ke seilu-ilu diau kediri lalu nguluka orang jil pansut lantang ati ngagai pengelepas, tang orang ke angkat ngelaban deka diau di menua ti nadai orang nguan.

⁷O Allah Taala, lebuh Nuan nguluka bala nembiak Nuan, lebuh Nuan bejalai nengah menua puang,

⁸ tanah berenyang, lalu hari ujan, laban Allah Taala Bukit Sinai datai,[119] laban Allah Taala ke disembah orang Israel datai.

⁹Nuan ngasuh hari ujan lalu ngasuh menua Nuan ti kusi nyadi manah baru.

¹⁰Bala nembiak Nuan berumah dia. Ulih pemadas Nuan, Nuan meri utai ngagai orang ke seranta.

¹¹TUHAN meri pesan, lalu mayuh bala indu mai berita tu:

¹²“Bala raja enggau bala soldadu sida rari!” Sida indu ke di rumah bedua utai ti udah dirampas, iya nya:

¹³anak patung burung achang ti disampak enggau pirak, ti bisi sayap ti bekebelik laban emas ti alus. (Nama kebuah sekeda kita diau dalam kandang bedus lebuh maya perang?)

¹⁴Lebuh Allah Taala ti Pemadu Bekuasa ngachirka bala raja ba Bukit Salmon, Iya ngasuh seleju labuh ba bukit nya.

¹⁵Naka meh pemesai bukit Basan, bukit ti mayuh tuchung!

¹⁶Nama kebuah nuan, O bukit ti mayuh tuchung, merening ke baruh enggau ati ti kepapas, ngagai bukit[120] ti udah dipilih Allah Taala alai Iya diau? TUHAN deka diau dia belama iya!

¹⁷TUHAN datai ari Sinai[121] enggau beribu-ribu buah kerita perang Iya ngagai endur ti kudus.

¹⁸ Iya niki ngagai endur ti tinggi, mai mayuh orang tangkap enggau Iya. Iya nerima pemeri ari orang ke udah angkat ngelaban. TUHAN Allah Taala deka diau dia.

¹⁹Puji meh TUHAN, ke mai ma kitai tiap hari. Iya nya meh Allah Taala ti ngelepaska kitai.

²⁰Allah Taala kitai nya Allah Taala ti meri kita pengelepas. Iya nya meh Allah Taala, ti TUHAN kitai, ke ngelepaska kitai ari pemati.

²¹Allah Taala tetap deka mechahka pala bala munsuh Iya, pala orang ke majak bedosa.

²²TUHAN udah madahka, “Aku deka mai bala munsuh nuan pulai ari Basan. Aku deka mai sida pulai ari buntut tasik,

²³ngambika kita ulih bejalai ngelunjak darah sida, lalu ukui kita nilat darah sida enggau naka peneka sida.”

²⁴Pemenang Nuan, O Allah Taala, dipeda semua orang, lebuh Allah Taala, ti Raja aku, mansang ngagai endur Iya ti kudus.

²⁵Bala orang ke belagu bejalai di mua, bala orang ke nebah musik bejalai di belakang, lalu ba entara sida nya bala indu ke biak, ke nebah tamborin.

²⁶“Puji meh Allah Taala lebuh bala nembiak Iya begempuru. Puji meh TUHAN, semua kita ke peturun Jakop!”

²⁷Sida ke terubah datai nya bala Benjamin, raban bansa ti pemadu mit, ditangkanka bala tuai bansa Judah enggau raban sida, dientudika bala tuai Sebulun enggau Naptali.

²⁸Ayanka kuasa Nuan, O Allah Taala, kuasa ti udah dikena Nuan ngarika kami

²⁹ari Rumah Nuan di Jerusalem, alai bala raja ke mai pemeri ngagai Nuan.

³⁰Rara meh Ejip, jelu ti siga dalam madang buluh. Rara meh semua bansa, raban sapi ti lelaki enggau anak sida, datai ke semua sida nyau meremi lalu meri pirak sida ngagai Nuan. Achirka bala orang ke rindu beperang![122]

³¹Bala pengari perintah[123] deka datai ari Ejip; orang Etiopia deka ngangkatka jari sida besampi ngagai Allah Taala.

³²Belagu muji Allah Taala, semua kita perintah dunya, belagu muji TUHAN,

³³ke Iya ti bejalai nengah langit, langit ti dulu kelia. Pendingka panjung Iya enggau penginggar nyawa Iya.

³⁴Padahka kuasa Allah Taala. Iya nyadi Raja merintah Israel. Langit ngayanka kuasa Iya.

³⁵Naka meh pemesai kuasa Allah Taala ke disembah orang Israel lebuh Iya datai ari endur Iya ti kudus, Iya ti Allah Taala ke disembah orang Israel! Iya meri pengering enggau kuasa ngagai nembiak Iya. Pujika Allah Taala!