Read Iban Masmur 69 Bible Online

Masmur 69 - Iban bible

Masmur 69

¹[124] Selamatka aku, O Allah Taala! Ai nyau naka rekung aku.

²Aku tengelam ba tanah rebuh ti dalam, lalu nadai tanah ti kering. Aku nyau datai ba ai ti dalam, lalu aku nyau deka lemas laban gelumbang.

³Aku nyau lelak ngangau minta tulung, lalu batang rekung aku nyau pedis. Mata aku nyau pedis, beperening ngiga tulung ari Nuan.

⁴ Orang ke begedika aku enggau nadai kebuah nyau mayuh agi ari lambar buk ti ba pala aku. Bala munsuh aku nusui utai ti bula ngelaban aku. Sida kering, lalu deka munuh aku. Sida mejalka aku mulaika utai ti ukai dichuri aku.

⁵O Allah Taala, aku enda ngelalaika dosa aku ari Nuan. Nuan nemu pemeli aku ngelamatu.

⁶O TUHAN ti Pemadu Bekuasa, anang nejuka aku mai pemalu ngagai orang ke manggaika pengarap sida ba Nuan! O Allah Taala ke disembah orang Israel, anang nejuka aku mai pemalu ngagai orang ke nyembah Nuan!

⁷Aku udah dipechat lalu dibalut pemalu ketegal Nuan.

⁸Ba kaban belayan aku, aku tu baka orang kampar. Ba kami sebilik, aku tu baka orang bansa bukai.

⁹ Pengangkun aku ke Rumah Nuan mau baka api. Jaku orang ke mechat Nuan, ninggang aku.

¹⁰Aku ngemaruhka diri[125] bepasa, lalu orang mechat aku.

¹¹Aku ngerasukka pekayan ulit, lalu sida ketawaka aku.

¹²Sida berandauka aku ba sebelah jalai raya, lalu orang ke pemabuk nyindir aku ngena pantun.

¹³Tang aku deka besampi ngagai Nuan, O TUHAN. Saut meh aku, O Allah Taala, ba maya ti ku ati Nuan. Saut meh aku laban pengerindu Nuan endang besai, laban Nuan ngamatka semaya Nuan ti deka ngelepas.

¹⁴Selamatka aku ngambika aku enda tengelam ba tanah ti rebuh. Ibun aku likun ari bala munsuh aku, likun ari ai ti dalam.

¹⁵Anang nejuka ai bah ngampuhka aku. Anang nejuka aku lemas dalam tasik tauka tengelam ba kubur.

¹⁶Saut aku, O TUHAN, laban pengerindu Nuan endang meruan. Ulih pengasih Nuan, malik meh Nuan ngagai aku!

¹⁷Anang belalai ari nembiak Nuan, laban aku balat dituntung penusah. Saut meh aku diatu!

¹⁸Datai ngagai aku, lalu selamatka aku. Selamatka aku ari bala munsuh aku.

¹⁹Nuan nemu pemalat aku dipechat, pemalat aku malu, lalu enda dibasa. Nuan meda semua munsuh aku.

²⁰Jaku pechat orang udah ngeruntuhka ati aku, lalu ati aku balat tusah. Aku udah ngadang orang deka sinu ati ke aku, tang nadai orang sinu ati ke aku. Aku andalka pengelantang, tang aku nadai nemu pengelantang.

²¹ Lebuh aku lapar, sida meri aku rachun. Lebuh aku aus, sida meri aku ai chuka.

²² Awakka pengerami makai besai sida, ngerusak sida. Awakka gawai sida ngasuh sida alah.

²³Asuh sida buta! Asuh tulang belakang sida lemi!

²⁴Bubuhka pengeringat Nuan ba sida. Awakka pengeringat Nuan ngalahka sida.

²⁵ Awakka kem sida nadai orang nguan. Awakka nadai orang agi idup dalam langkau kain sida.

²⁶Laban sida merinsaka orang ke udah diukum Nuan, berandauka pemerinsa orang ke udah bakal laban Nuan.

²⁷Tuliska magang semua dosa sida. Anang meri sida bagi dalam pengelepas Nuan.

²⁸ Awakka nama sida dibuai ari bup pengidup. Awakka nama sida enda ditulis dalam list nama bala nembiak Nuan.

²⁹Tang aku pedis sereta tusah ati. Angkatka aku, O Allah Taala, lalu selamatka aku!

³⁰Aku deka bepantun muji Allah Taala. Aku deka meri terima kasih ngagai Iya kena aku madahka pemesai kuasa Iya.

³¹Tu deka ngerinduka ati TUHAN lebih agi ari jelu sapi ti diberi nyadika piring, lebih agi ari sapi ti lelaki, ti diberi nyadika piring.

³²Lebuh orang ke kena tekan meda nya, sida deka gaga. Orang ke nyembah Allah Taala, deka diperansang.

³³TUHAN mendingka orang ke suntuk lalu ingatka bala nembiak Iya ke dalam rumah jil.

³⁴Pujika Allah Taala, O serega enggau dunya, tasik enggau semua utai ti idup dalam sida.

³⁵Iya deka ngelepaska Jerusalem lalu nirika baru nengeri di menua Judah. Bala nembiak Iya deka diau dia, lalu bempu menua nya.

³⁶Peturun bala nembiak Iya deka bempu menua nya nyadika pesaka sida, lalu orang ke rinduka Iya, deka diau dia.