Read Iban Masmur 7 Bible Online

Masmur 7 - Iban bible

Masmur 7

¹[8] O TUHAN Allah Taala aku, aku ngenduh ngagai Nuan; Selamat lalu lepaska aku ari semua orang ke begagaika aku,

²enggai ke sida nyarikka aku baka singa, narit aku, lalu nadai orang ngelepaska aku.

³O TUHAN Allah Taala aku, enti aku udah ngereja tu, enti jari aku udah ngereja penyalah,

⁴enti aku udah malas pangan aku ngena penyai tauka ngenchuri utai ari munsuh aku enggau nadai kebuah,

⁵awakka munsuh aku begagaika aku lalu ulih nitihka aku, lalu awakka iya ngelunjak aku ba tanah, lalu nejuka semengat aku begulai enggau amau.

⁶Angkat meh Nuan O TUHAN, mai pengeringat Nuan! Bediri meh Nuan TUHAN ngelaban pengeringat bala munsuh aku. Dani meh Nuan, O Allah Taala aku; Nuan deka ngakim.

⁷Gempuruka semua bansa ngelingi Nuan, lalu perintah sida ari serega.[9]

⁸Nuan endang ngakim semua mensia. Akim meh aku, O TUHAN, nitihka pengelurus aku nitihka pemetul ati aku.

⁹ Awakka penyai orang ke jai abis magang, tang awakka Nuan ke lurus, Nuan ke meresa semua runding enggau ati, nyadi Allah Taala ti lurus.

¹⁰Allah Taala endang terabai aku. Iya nyelamatka orang ke lurus.

¹¹Allah Taala endang Hakim ti lurus, Allah Taala seruran ngukum orang ke jai.

¹²Enti sida enda ngubah ulah diri, Allah Taala deka ngansah pedang Iya. Iya udah narit lalu nyendiaka panah Iya.

¹³Iya udah nyendiaka senyata Iya ti bisa lalu ngichingka laja Iya ti beapi-api.

¹⁴Peda chara orang ke jai berundingka jalai ngereja penyai. Iya berunding deka ngaga pengachau, lalu ngemulaka orang.

¹⁵Iya numbak lubang kebung, lalu iya empu labuh ngagai lubang kebung nya.

¹⁶Penyai iya empu ninggang pala iya empu lalu pemangah iya empu ninggang puchuk pala iya empu.

¹⁷Aku deka meri terima kasih ngagai TUHAN ketegal pengelurus Iya, lalu aku deka belagu muji nama TUHAN ti Pemadu Tinggi.