Read Iban Masmur 71 Bible Online

Masmur 71 - Iban bible

Masmur 71

¹TUHAN, aku datai ngagai Nuan minta Nuan nyaga aku. Anang nejuka aku alah!

²Laban Nuan lurus, nya alai tulung meh aku lalu lepaska aku. Pendingka aku, lalu selamatka aku!

³Awakka Nuan nyadi pengelindung aku sereta nyadi kuta ti tegap nyaga aku, laban Nuan nyadika batu enggau kuta aku.

⁴O Allah Taala aku, lepaska aku ari orang ke jai, ari kuasa orang ke merinsaka orang, enggau ari orang ke jai ati.

⁵TUHAN ti Pemadu Tinggi, aku manggaika pengandal ati aku ba Nuan. Aku endang udah manggaika diri ba Nuan kenyau ari aku agi biak.

⁶Aku udah ngarapka Nuan seumur idup. Nuan udah nyaga aku kenyau ari aku ada. Aku deka seruran muji Nuan.

⁷Pengidup aku udah nyadika teladan orang mayuh, laban Nuan udah kering nyaga aku.

⁸Aku muji Nuan sepemanjai hari, lalu madahka mulia Nuan.

⁹Anang nulak aku ketegal aku nyau tuai. Anang ninggalka aku ketegal aku nyau lemi.

¹⁰Bala munsuh aku deka munuh aku. Sida berandau lalu bepekat deka ngelaban aku.

¹¹Ku sida, “Allah Taala udah ninggalka iya. Aram kitai nitihka iya, lalu nangkap iya. Nadai orang deka ngelepaska iya.”

¹²O Allah Taala, anang jauh ari aku; O Allah Taala aku, datai enggau jampat lalu tulung aku!

¹³Awakka orang ke nyerang aku alah lalu dirusak. Awakka orang ke nguji ngemediska aku malu lalu dipechat.

¹⁴Aku deka seruran manggaika pengandal ati aku ba Nuan. Aku deka bebendar agi muji Nuan.

¹⁵Aku deka nusui pasal pemadas Nuan. Aku deka bejakuka pasal pengelepas Nuan sepemanjai hari, taja pen aku enda nemu semua utai nya.

¹⁶Aku deka bejalai ngena pengering TUHAN Allah Taala. Aku deka madahka pemadas Nuan siku aja.

¹⁷Nuan udah ngajar aku kenyau ari aku agi biak, lalu aku mengkang madahka pemadas pengawa Nuan.

¹⁸Taja pen aku nyau tuai, lalu buk aku nyau buban, anang meh Nuan ninggalka aku, O Allah Taala! Awakka Nuan seruran enggau aku lebuh aku madahka pasal kuasa enggau pengering Nuan ngagai semua turun-menurun jemah ila.

¹⁹O Allah Taala, pengelurus Nuan nyau ngeninggi langit. Nuan udah ngereja pengawa ti besai. Nadai orang sebaka enggau Nuan.

²⁰Nuan udah ngasuh penusah enggau pemerinsa ninggang aku, tang Nuan deka ngasuh aku kering baru. Nuan deka nagang aku tama ngagai kubur.

²¹Nuan deka ngaga aku besai agi ari ti udah. Nuan deka merindang aku baru.

²²Aku endang amat deka muji Nuan ngena belikan. Aku deka muji penetap ati Nuan, O Allah Taala aku. Aku deka nebah belikan lalu belagu ke Nuan Allah Taala ti Kudus ke disembah orang Israel.

²³Aku deka manjung gaga ati lebuh aku nebah musik ke Nuan. Aku deka belagu enggau pengabis pengering, semengat enggau roh aku laban Nuan udah ngelepaska aku.

²⁴Aku deka bejakuka pasal pengelurus Nuan sepemanjai hari, laban orang ke nguji ngemediska aku udah alah lalu dipechat.