Read Iban Masmur 73 Bible Online

Masmur 73 - Iban bible

Masmur 73

¹[131] Allah Taala endang manah enggau orang Israel, enggau orang ke tuchi ati.

²Tang aku nyau deka enda agi kempang ati. Pengarap aku nyau deka abis

³laban aku ngining orang ke sumbung lebuh aku meda orang ke jai nyamai diau.

⁴Sida nadai natka diri pedis. Sida kering sereta bepengerai.

⁵Sida enda merinsa baka orang bukai. Sida enda ditinggang penusah baka orang bukai.

⁶Nya alai sida betenggakka penyumbung lalu nyerayung diri enggau pemangah.

⁷Ati sida nuang penyai,[132] lalu sida kiruh bekiraka akal ti jai.

⁸Sida ketawaka orang bukai, lalu bejakuka utai ti jai. Sida sumbung lalu begagaka pelan kena nekanka pengidup orang bukai.

⁹Sida bejaku jai pasal Allah Taala ti di serega lalu ngeninggika diri meri atur ngagai semua orang di dunya,

¹⁰datai ke bala nembiak Allah Taala Empu nyau nguingka diri ngagai sida lalu gagit ati arapka sebarang utai ti disebut sida.[133]

¹¹Ku sida, “Allah Taala enda nemu. Allah Taala ti Pemadu Tinggi enda nemu.”

¹²Nya meh gaya orang ke jai. Sida endang mayuh utai, lalu selalu bulih mayuh agi utai.

¹³Enti pia, nama guna aku diau tuchi lalu enda bedosa?

¹⁴O Allah Taala, Nuan udah ngasuh aku natka pemerinsa sepemanjai hari. Genap pagi Nuan udah nganu aku.

¹⁵Enti aku bisi udah nyebut utai munyi nya, aku tentu enda ngaga diri baka nembiak Nuan.

¹⁶Aku udah nguji berundingka pasal penusah tu, tang utai tu kelalu mar ke aku

¹⁷datai ke aku nyau mansang ngagai Rumah Nuan. Nya baru aku nemu utai ti deka nyadi ba orang ke jai.

¹⁸Nuan ngengkahka sida ba endur ti lichin lalu ngasuh sida labuh ngagai pengerusak!

¹⁹Sida dirusak tekala nya, lalu pengujung sida amat jai.

²⁰Sida baka mimpi ti lenyau pagi hari. Lebuh Nuan dani, O TUHAN, sida lesap.

²¹Lebuh runding aku jai lalu ati aku pedis,

²²aku beli baka jelu. Aku enda meretika Nuan.

²³Tang aku seruran semak Nuan, lalu Nuan megai jari aku.

²⁴Nuan ngiring aku ngena ajar Nuan lalu ba pengujung iya, Nuan deka nerima aku ngena basa.

²⁵Nama utai bukai ti dikemisi aku di serega kelimpah ari Nuan Empu? Laban aku bisi Nuan, nama utai bukai agi dikedekaka aku di dunya tu?

²⁶Runding enggau tubuh aku nyangka tau nyadi lemi, tang Allah Taala nyadika pengering aku. Semina Iya siku aja diguna aku.

²⁷Orang ke ninggalka Nuan tentu deka mati. Nuan deka ngerusak sida ke enda tetap ati ngagai Nuan.

²⁸Tang aku empu, naka meh pengelantang aku diau semak Allah Taala, dijaga TUHAN ti Pemadu Tinggi, lalu madahka pasal semua utai ti udah dikereja Iya!