Read Iban Masmur 74 Bible Online

Masmur 74 - Iban bible

Masmur 74

¹[134] Nama kebuah Nuan ninggalka kami baka tu, O Allah Taala? Kati Nuan deka ringat belama iya ngagai bala nembiak Nuan?

²Kingatka bala nembiak Nuan, ti udah dipilih Nuan Empu dulu kelia, ti udah dibai Nuan pansut ari pengidup sida ke nyadi ulun, lalu nyadi raban bansa Nuan Empu. Kingatka Bukit Sion, ti udah alai Nuan diau dulu kelia.

³Bejalai meh Nuan nengah semua tembawai tu. Bala munsuh kami udah ngerusak semua utai dalam Rumah Sembiang.

⁴Bala munsuh Nuan udah manjung dalam Rumah Nuan madahka pemenang diri. Sida udah nuatka menira kena sida nandaka diri menang.

⁵Gamal sida baka orang ke kereja batang ke betebangka kayu ngena kapak.[135]

⁶Sida mechahka semua papan ukir ngena kapak enggau tukul sida.

⁷Sida ngerusak lalu nunu Rumah Nuan. Sida ngamahka endur alai Nuan disembah.

⁸Sida endang deka ngalahka kami abis. Sida nunu semua endur ti kudus di menua tu.

⁹Semua tanda ti kudus udah abis magang. Bala nabi nadai agi tinggal, lalu nadai orang nemu pengelama utai tu deka nyadi.

¹⁰Ni pengelama bala munsuh kami deka ketawaka Nuan, O Allah Taala? Kati sida deka mechat nama Nuan belama iya?

¹¹Nama kebuah Nuan enggai nulung kami? Nama kebuah Nuan diau jenuh lalu melawikka jari?[136]

¹²Tang Nuan endang Raja kami kenyau ari pun, O Allah Taala. Nuan suah udah ngelepaska kami.

¹³ Ngena pengering kuasa Nuan, Nuan udah melah tasik lalu mechahka pala naga tasik.

¹⁴ Nuan udah ngeredakka pala naga tasik[137] lalu ngasuh bangkai iya diempa jelu[138] di menua puang.

¹⁵Nuan ngasuh ai pansut ari mata ai, lalu ngasuh ai engkeching. Nuan udah ngerangkaika sungai ti besai.

¹⁶Nuan udah ngaga siang enggau malam. Nuan udah ngengkahka mata hari enggau bulan ba endur sida.

¹⁷Nuan ngeletak pemesai dunya. Nuan ngeletak musin panas enggau musin chelap.

¹⁸Tang ingat, O TUHAN, bala munsuh Nuan ketawaka Nuan. Sida nya orang ke enda arapka Nuan, sereta ngeleseka Nuan.

¹⁹Anang ninggalka bala nembiak Nuan ti nadai daya tu ba jari munsuh sida ke jai. Anang enda ingatka bala nembiak Nuan ke diperinsaka orang!

²⁰Kingatka sempekat ti udah digaga Nuan enggau kami. Utai ti kasar bisi ba semua teluk ti petang di menua tu.

²¹Anang nejuka orang ngemaluka sida ke kena tekan. Awakka orang ke seranta enggau suntuk muji Nuan.

²²Angkat meh Nuan, Allah Taala, lalu bejaku ngarika Nuan Empu! Kingatka orang bansa bukai ke ketawaka Nuan sepemanjai hari.

²³Anang enda ingatka panjung munsuh Nuan, penginggar bala munsuh Nuan ti enda nemu badu.