Read Iban Masmur 77 Bible Online

Masmur 77 - Iban bible

Masmur 77

¹[143] Aku nyabak duie-duie ngagai Allah Taala. Aku nyabak duie-duie, lalu Iya ninga aku.

²Lebuh maya tusah, aku besampi ngagai TUHAN. Semalam-malam aku ngangkatka jari besampi, tang aku nadai nemu utai ti ulih merindang aku.

³Lebuh aku berundingka Allah Taala, aku bedemuh. Lebuh aku belematika Iya, semengat aku alah.

⁴Iya nagang aku tinduk semalam-malam. Ati aku balat irau, datai ke aku nyau enda ulih bejaku.

⁵Aku berundingka utai ti udah nyadi lalu ngingatka taun ti dulu kelia.

⁶Semalam-malam nya aku bebendar amat berunding. Aku belemati, lalu tu utai ti ditanyaka aku dalam ati aku:

⁷“Kati Allah Taala deka seruran nulak kitai? Kati Iya enggai agi gaga ati ke kitai?

⁸Kati Iya udah badu rinduka kitai? Kati semaya Iya nadai diguna agi?

⁹Kati Allah Taala enda ingat kasihka kitai? Kati pengeringat Iya udah dibali Iya nyadi penyiru?”

¹⁰Udah nya aku bejaku, “Utai ti balat ngenusahka ati aku nya: Allah Taala nadai bekuasa agi.”[144]

¹¹Aku deka ngingatka pemesai kereja Nuan, O TUHAN. Aku deka ngingatka utai ti nyelai ti udah dikereja Nuan dulu kelia.

¹²Aku deka berundingka semua utai ti udah dikereja Nuan. Aku deka belematika semua pengawa Nuan ti besai.

¹³Semua utai ti dikereja Nuan, O Allah Taala, endang kudus magang. Nadai petara bukai ke bekuasa baka Nuan.

¹⁴Nuan tu meh Allah Taala ti ngereja kereja ajih. Nuan udah ngayanka kuasa Nuan ngagai semua bansa.

¹⁵Ngena kuasa Nuan, Nuan udah nebus bala nembiak Nuan, iya nya peturun Jakop enggau Josep.

¹⁶Lebuh tasik meda Nuan, O Allah Taala, sida takut, lalu buntut tasik begetar.

¹⁷Mua hari mubuhka ai ujan. Guntur meletup di langit lalu kilat nyelar.

¹⁸Guntur Nuan inggar deram-deram, lalu kilat ti nyelar meri penampak ngagai dunya. Dunya begetar sereta berenyang.

¹⁹Nuan bejalai ngerenchah gelumbang. Nuan meraka tasik ti dalam, tang bekau kaki Nuan enda ulih dipeda.

²⁰Nuan nguluka bala nembiak Nuan baka pengibun bedus lalu Moses seduai Aron nyadi tuai sida.