Read Iban Masmur 78 Bible Online

Masmur 78 - Iban bible

Masmur 78

¹[145] Pendingka ajar aku, kita ke nembiak aku, lalu peratika utai ti disebut aku.

² Aku deka bejaku ngena jaku sempama lalu nerangka utai ti nyelai ti nyadi dulu kelia,

³utai ti udah didinga sereta ditemu kitai, utai ti udah dipadahka aki ini kitai ngagai kitai.

⁴Kitai enda tau ngelalaika utai nya ari bala anak kitai. Kitai deka madahka utai nya ngagai serak ti nangkanka kitai pasal kuasa TUHAN, enggau pasal pemesai pengawa Iya enggau utai ti badas ti udah dikereja Iya.

⁵Iya meri adat ngagai orang Israel enggau pesan ngagai peturun Jakop. Iya meri atur ngagai bala aki ini kitai ngasuh sida ngajar Adat Iya ngagai bala anak sida,

⁶ngambika serak ke nangkanka sida ulih belajarka adat nya lalu madahka adat nya ngagai bala anak sida ke nangkanka sida.

⁷Nya meh jalai sida deka manggaika pengarap sida ba Allah Taala lalu seruran ingatka utai ti udah dikereja Iya, sereta seruran ngasika pesan Iya.

⁸Sida enda baka aki ini sida ke seruran angkat ngelaban sereta enda ngasi, ti nadai kala manggaika pengarap sida tegap ba Allah Taala lalu enda tetap ati ngagai Iya.

⁹Orang Epraim, ke besenyataka panah enggau laja, rari lebuh beperang.

¹⁰Sida enda ngingatka sempekat sida enggau Allah Taala. Sida enggai ngasika Adat Iya.

¹¹Sida enda ingatka utai ti udah dikereja Iya, iya nya kereja ajih ti udah dipeda sida kereja Iya.

¹² Lebuh bala aki ini sida ngemata, Allah Taala ngereja kereja ajih ba emperan Zoan, di menua Ejip.

¹³ Iya melah tasik, lalu mai sida bejalai nengah tasik nya. Iya ngasuh ai bediri baka dinding.

¹⁴ Lebuh siang hari, Iya nguluka sida ngena mua hari lalu lebuh malam hari Iya nguluka sida ngena penampak daun api.

¹⁵Iya melah batu di menua puang lalu meri sida mayuh ai.

¹⁶ Iya ngasuh ai pansut ari batu lalu ngasuh ai nya rarat baka sungai.

¹⁷Tang sida majak bedosa ngelaban Allah Taala, lalu di menua puang nya sida angkat ngelaban Iya ti Pemadu Tinggi.

¹⁸ Sida endang sengaja nguji Allah Taala lebuh sida minta pemakai ti dikedekaka sida.

¹⁹Sida bejaku ngelaban Allah Taala, lalu ku sida, “Kati Allah Taala ulih meri pemakai di menua puang tu?

²⁰Iya amat udah malu batu, lalu ai rarat ari batu nya baka ai bah. Tang kati Iya ulih mega meri kitai roti lalu meri dagin ngagai bala nembiak Iya?”

²¹Nya alai TUHAN ringat lebuh Iya ninga sida. Iya nyerang bala nembiak Iya ngena api, lalu Iya majak ringat ngagai sida,

²²laban sida enda arapka Iya lalu enda arapka Iya deka ngidupka sida.

²³Tang Iya bejaku ngagai langit di atas ngasuh pintu langit tebuka.

²⁴ Iya meri sida gandum ari serega, lebuh Iya meri sida mana nyadika pemakai sida.

²⁵Nya alai sida makai pemakai melikat, lalu Allah Taala meri sida sepemayuh ti dikedekaka sida.

²⁶Iya mega ngasuh ribut timur muput, lalu ngena kuasa Iya, Iya nyungkak ribut muput ari selatan.

²⁷Lalu ngagai bala nembiak Iya, Iya nganjung burung ngemayuh igi pasir ti ba tebing tasik.

²⁸Burung nya labuh ba tengah-tengah kem ngelingi semua langkau kain.

²⁹Nya alai orang mayuh makai, lalu kenyang magang. Allah Taala meri sida utai ti dikedekaka sida.

³⁰Tang sebedau sida puas ati makai utai nya, lebuh pemakai nya agi dalam nyawa sida,

³¹Allah Taala lalu ringat ngagai sida lalu munuh bala lelaki sida ke kering, orang ke pemadu kering di menua Israel.

³²Tang taja pia, orang mayuh majak bedosa. Taja pen Iya ngereja kereja ajih, sida mengkang enggai manggaika pengarap sida ba Iya.

³³Nya alai Iya ngabiska umur sida baka kesuh seput lalu ngapuska nyawa sida ngena penusah ti datai enggau ngenyit.

³⁴Genap kali Iya munuh sekeda bala sida, sida ti bukai nguingka diri ngagai Iya. Sida nesal ati, lalu bebendar besampi ngagai Iya.

³⁵Sida ingatka Allah Taala endang penyaga sida, ingatka Iya ti Pemadu Bekuasa udah datai nulung sida.

³⁶Tang jaku sida bula semua. Utai ti disebut sida ukai datai ari ati.

³⁷ Sida enda taluk ngagai Iya. Sida enda tetap ati ngagai sempekat sida enggau Iya.

³⁸Tang Allah Taala kasihka nembiak Iya. Iya ngampun dosa sida lalu enda ngerusak sida. Iya suah nagang Diri ringat lalu nagang Diri ngeransi.

³⁹Iya ingatka sida endang semina mensia aja, baka ribut ti mansa lalu nadai datai agi.

⁴⁰Sida suah amat angkat ngelaban Iya di menua puang. Sida suah ngasuh ati Iya tusah!

⁴¹Sida enda nemu badu nguji Allah Taala lalu ngenusahka ati Allah Taala ke disembah orang Israel ti kudus.

⁴²Sida enda ingatka pemesai kuasa Iya enggau hari Iya ngelepaska sida ari bala munsuh sida

⁴³sereta ngereja pengawa ti besai enggau kereja ajih ba emperan Zoan di menua Ejip.

⁴⁴ Iya ngasuh sungai bebali nyadi darah, lalu orang Ejip nadai ai irup.

⁴⁵ Iya ngasuh lalat datai kena merinsaka sida, enggau engkatak kena ngerusak menua sida.

⁴⁶ Iya ngasuh buntak makai utai ti ditanam sida lalu ngerusak umai sida.

⁴⁷ Iya ngerusak batang anggur sida ngena ujan batu enggau kayu ara sida ngena ambun ti meku.

⁴⁸Iya munuh jelu sapi sida ngena ujan batu enggau jelu tupi sida ngena kilat.[146]

⁴⁹Iya ngasuh sida balat tusah lebuh Iya mubuhka pengeringat enggau ransi Iya, ti datai mai pemati.

⁵⁰Iya enda nagang diri ringat tauka ngalau nyawa sida, tang munuh sida ngena penyakit ti balat.

⁵¹ Iya munuh anak tuai ari semua ruang bilik orang Ejip.

⁵² Udah nya, Iya lalu nguluka bala nembiak Iya, baka pengibun bedus lalu ngiring sida nengah menua puang.

⁵³ Iya nguluka sida enggau likun, lalu sida enda takut. Tang tasik ngelamun bala munsuh sida.

⁵⁴ Iya mai sida ngagai menua Iya ti kudus, ngagai bukit ti udah dialahka Iya Empu.

⁵⁵ Iya muru orang ke nguan menua nya, lebuh bala nembiak Iya nyerang. Iya magi menua sida ngagai raban bansa orang Israel lalu meri rumah orang nya ngagai bala nembiak Iya.

⁵⁶ Tang sida angkat ngelaban Allah Taala ti Pemadu Bekuasa lalu nguji Iya. Sida enda ngasika adat Iya,

⁵⁷tang ngelaban sereta enda taluk baka aki ini sida, enda tau dikarapka, baka laja ti bingkuk.

⁵⁸Sida nyungkak TUHAN ringat ngena endur alai orang kapir nyembah petara sida, lalu nyungkak Iya pedis ati ngena engkeramba sida.

⁵⁹Allah Taala ringat lebuh Iya meda utai nya, nya alai Iya nulak semua nembiak Iya.

⁶⁰ Iya ninggalka langkau kain Iya di Siloh,[147] rumah ti udah alai Iya diau begulai enggau kitai.

⁶¹ TUHAN nejuka bala munsuh kitai ngerampas Peti Lampang Batu Adat, ti nyadika tanda kuasa enggau mulia Iya.

⁶²Iya ringat ngagai bala nembiak Iya Empu lalu nejuka sida dibunuh munsuh.

⁶³Orang ke bujang mati beperang, lalu sida ke dara nadai orang enggau jadi.

⁶⁴Bala imam mati dibunuh ngena pedang, lalu balu sida enda tau ngulit.

⁶⁵Udah nya TUHAN angkat baka ke dani tinduk, baka orang ke baru gerai mabuk.

⁶⁶Iya muru bala munsuh Iya lalu sida rari lalu Iya ngemaluka sida belama iya.

⁶⁷Tang Iya nulak peturun Josep. Iya enda milih raban bansa Epraim,

⁶⁸tang milih raban bansa Judah enggau Bukit Sion, ti balat dikerinduka Iya.

⁶⁹Dia Iya ngaga Rumah Sembiang Iya baka rumah Iya ti di serega. Iya ngaga Rumah Sembiang nya tegap baka dunya empu, kukuh belama iya.

⁷⁰ TUHAN milih nembiak Iya David. Iya ngambi David ari padang rumput,

⁷¹alai David ke ngibun raban bedus iya, lalu ngasuh iya nyadi raja menua Israel, nyadi pengibun ke bala nembiak Allah Taala.

⁷²David ngibun sida enggau pengabis pengangkun ati iya lalu nguluka sida enggau pengelandik.