Read Iban Masmur 81 Bible Online

Masmur 81 - Iban bible

Masmur 81

¹[150] Manjung gaga ati ke Allah Taala ti nyaga kitai. Belagu muji Allah Taala Jakop!

²Tebah musik enggau tamborin. Tebah musik ti manah didinga ngena belikan enggau engkeratung.

³ Sepu terumpit lebuh kita begawai, lebuh maya anak bulan, enggau lebuh bulan peranama.

⁴Tu adat menua Israel, atur ti diletak Allah Taala Jakop.

⁵Iya meri adat nya ngagai orang Israel lebuh Iya nyerang menua Ejip. Aku ninga munyi nyawa ti enda dikelala bejaku,

⁶“Aku ngingkaska ma ti berat ari belakang kita. Aku ngasuh kita ngelengkaka batu bata ari jari kita.

⁷ Lebuh kita kena laban penusah, kita ngangauka Aku, lalu Aku ngelepaska kita. Ari endur alai Aku ke belalai dalam biaubalai, Aku nyaut kita. Aku nguji kita ba mata ai di Meribah.

⁸Pendingka jaku tangkan Aku, kita ke nembiak Aku. Israel, naka meh pemanah enti kita deka mendingka Aku!

⁹ Kita enda tau sekali-kali nyembah petara bukai.

¹⁰Aku tu TUHAN Allah Taala kita, ti udah mai kita pansut ari menua Ejip. Perangapka nyawa kita, ngambika Aku nyapi kita.

¹¹“Tang bala nembiak Aku enggai mendingka Aku. Israel enggai ngasika Aku.

¹²Nya alai Aku nejuka sida nitihka pengekieh sida lalu ngereja sebarang utai ti dikedekaka sida.

¹³Naka meh pemanah enti bala nembiak Aku deka mendingka Aku. Naka meh pemanah enti sida deka ngasika Aku!

¹⁴Aku deka ngalahka munsuh sida enggau jampat lalu ngalahka semua munsuh sida.

¹⁵Orang ke begedika Aku deka meremi enggau ati ti nangi di mua Aku. Ukum sida deka mengkang belama iya.

¹⁶Tang aku deka nupi kita ngena gandum ti pemadu manah lalu ngasuh kita kenyang ngena ai manyi.”