Read Iban Masmur 83 Bible Online

Masmur 83 - Iban bible

Masmur 83

¹[152] O Allah Taala, anang enda bemunyi. Anang enda engkebut, anang diau jenuh!

²Peda bala munsuh Nuan angkat ngelaban, lalu orang ke begedika Nuan angkat ngelaban.

³Sida begagaka pelan ti resia kena sida ngelaban bala nembiak Nuan. Sida bepekat ngelaban orang ke dijaga Nuan.

⁴Ku sida bejaku, “Aram kitai ngerusak bansa sida, ngambika bansa orang Israel nadai agi dikingatka belama iya.”

⁵Sida lalu besetujuka pelan nya, lalu beserakup ngelaban Nuan:

⁶orang Edom enggau orang Ismail, orang Moap enggau orang Hagri,

⁷orang Gebal, Amon, enggau orang Amalek, orang Pilistin, enggau orang Tire.

⁸Asiria mega setanah enggau sida nyadi raban ti kering ke orang Amon enggau orang Moap, ti peturun Lot.

⁹ Laban meh sida baka Nuan ti udah ngelaban orang Midian, baka Nuan ti udah ngelaban Sisera seduai Jabin ba Sungai Kison.

¹⁰Nuan udah ngalahka sida di En-dor, lalu bangkai sida but ba tanah.

¹¹ Serang meh bala tuai sida baka Nuan ti udah nyerang Orep seduai Sip. Alahka semua orang ke merintah sida, baka Nuan ti udah ngalahka Sebah seduai Salmuna,

¹²ke nyebut, “Kitai deka ngerampas menua Allah Taala nyadika menua kitai empu.”

¹³Taburka sida baka amau, O Allah Taala, baka rumput ti rangkai ti dikebuka ribut,

¹⁴baka api ti nganguska utan, baka daun api ti nyelar nganguska munggu,

¹⁵baka nya meh Nuan muru sida ngena biaubalai Nuan lalu ngenakutka sida ngena ribut Nuan ti balat.

¹⁶Asuh sida berasai malu, O TUHAN, ngambika sida ngiga nama Nuan.

¹⁷Awakka sida alah lalu takut belama iya. Awakka sida mati sereta abis dipechat.

¹⁸Awakka sida nemu Nuan siku aja ti TUHAN, Raja ti Pemadu Tinggi ke serata dunya.