Read Iban Masmur 86 Bible Online

Masmur 86 - Iban bible

Masmur 86

¹[156] Pendingka aku, O TUHAN, lalu saut aku, laban aku nadai daya agi sereta lemi.

²Selamatka aku ari pemati, laban aku taluk ngagai Nuan. Selamatka aku, laban aku tu nembiak Nuan lalu aku manggaika pengarap aku ba Nuan.

³Nuan endang Allah Taala aku, nya alai kasihka aku. Aku besampi ngagai Nuan sepemanjai hari.

⁴Asuh ati nembiak Nuan gaga, O TUHAN, laban aku besampi ngagai Nuan.

⁵Nuan endang manah enggau kami, sereta ngampun. Nuan penuh laban pengerindu ke semua orang ke besampi ngagai Nuan.

⁶Pendingka sampi aku, O TUHAN. Dingaka aku ke nyabak minta tulung.

⁷Aku ngangauka Nuan lebuh maya tusah, laban Nuan nyaut sampi aku.

⁸Nadai petara bukai ke baka Nuan, O TUHAN. Nadai siku ti udah ngereja utai baka ke udah dikereja Nuan.

⁹ Semua bansa ti udah digaga Nuan deka datai lalu meremi ngagai Nuan. Sida deka muji pemesai kuasa Nuan.

¹⁰Nuan endang bekuasa, sereta ngereja utai ti badas. Semina Nuan siku aja ti Allah Taala.

¹¹Ajar aku, O TUHAN, utai ti diasuh Nuan kereja aku, ngambika aku tetap ati ngasika Nuan. Ajar aku betuaika Nuan enggau pengabis pengangkun ati aku.

¹²Aku deka muji Nuan enggau pengabis ati aku, O TUHAN Allah Taala aku. Aku deka ngemesaika Nuan belama iya.

¹³Naka meh pemesai pengerindu Nuan ti meruan belama iya. Nuan udah ngelepaska aku ari kubur.

¹⁴O Allah Taala, orang ke sumbung datai ngelaban aku, bala orang ke jai nguji munuh aku, orang ke enggai mendingka Nuan.

¹⁵Tang Nuan, O TUHAN, endang Allah Taala ti kasih sereta rindu, seruran liat ati, seruran nelap sereta tetap ati.

¹⁶Nguing ngagai aku, lalu kasihka aku. Keringka aku, lalu selamatka aku, laban aku betuaika Nuan baka indai aku suba.

¹⁷Ayanka ngagai aku tanda pemadas Nuan, TUHAN, ngambika orang ke begedika aku nemu malu lebuh sida meda Nuan udah merindang sereta nulung aku.