Read Iban Masmur 88 Bible Online

Masmur 88 - Iban bible

Masmur 88

¹[159] TUHAN Allah Taala ti Juruselamat aku, aku nyabak sepemanjai hari, lalu lebuh malam hari, aku datai ngadap ngagai Nuan.

²Dingaka sampi aku. Pendingka kangau aku ke minta tulung!

³Mayuh amat penusah udah ninggang aku datai ke aku nyau deka mati.

⁴Aku tu baka semua orang bukai ke nyau deka mati. Aku nadai pengering agi.[160]

⁵Aku ditinggalka begulai enggau orang ke mati. Aku tu baka orang ke udah dibunuh, ke garing-garing dalam kubur, ti enda dikingatka Nuan agi, ti enda ulih ditulung agi.

⁶Nuan udah muai aku ngagai buntut lubang kubur, ngagai lubang kebung ti pemadu petang sereta dalam.

⁷Pengeringat Nuan berat amat ninggang aku, lalu aku nyau redak dilamun umbak iya.

⁸Nuan udah ngasuh bala pangan aku ninggalka aku. Nuan udah ngasuh sida keji meda aku. Aku dikelulung, lalu enda ulih rari.

⁹Mata aku nyau kabur laban merinsa. O TUHAN, tiap hari aku ngangauka Nuan lalu ngangkatka jari aku besampi.

¹⁰Kati Nuan ngereja kereja ajih ke orang ke mati? Kati sida ke mati angkat lalu muji Nuan?

¹¹Kati pengerindu Nuan ti meruan belama iya bisi dikenang dalam kubur? Kati penetap ati Nuan dikenang ba endur alai pengerusak?

¹²Kati kereja ajih Nuan bisi dipeda ba endur ti petang nya? Kati pemadas Nuan bisi ditemu di dunya pemati?

¹³O TUHAN, aku ngangauka Nuan minta tulung. Tiap pagi aku besampi ngagai Nuan.

¹⁴Nama kebuah Nuan nulak aku, O TUHAN? Nama kebuah Nuan ninggalka aku?

¹⁵Kenyau ari aku agi biak, aku udah merinsa lalu nyau deka mati. Aku nyau lelak[161] natka pemerat ukum ari Nuan.

¹⁶Pemalat pengeringat Nuan ngelamun aku. Serang Nuan ngerusak aku.

¹⁷Sida ngelulung aku baka ai bah sepemanjai hari. Sida datai semak ngagai aku ari semua endur.

¹⁸Nuan udah ngasuh pangan aku ninggalka aku. Ka semina pemetang aja nyadika sulu aku.