Read Iban Masmur 89 Bible Online

Masmur 89 - Iban bible

Masmur 89

¹[162] O TUHAN, aku deka seruran belagu ngenang pengerindu Nuan ti meruan belama iya. Aku deka madahka penetap ati Nuan belama iya.

²Aku nemu pengerindu Nuan deka meruan belama iya, lalu penetap ati Nuan deka meruan baka langit.

³Ku Nuan, “Aku udah ngaga sempekat enggau siku orang ke udah dipilih Aku. Aku udah besemaya enggau nembiak Aku David,

⁴ ‘Peturun nuan deka betampung nyadi raja. Aku deka ngasuh perintah nuan tan belama iya.’ ”

⁵Serega belagu muji pemanah utai ti dikereja Nuan. Sida ke kudus belagu muji penetap ati Nuan, O TUHAN.

⁶Nadai orang di langit sebaka enggau Nuan, O TUHAN. Nadai orang di serega sebaka enggau Nuan.

⁷Raban kunsil ti kudus nangi magang ke Nuan. Semua sida bela takutka Nuan.

⁸O TUHAN Allah Taala ti Pemadu Bekuasa, nadai orang bekuasa baka Nuan. O TUHAN, Nuan endang tetap ati dalam semua utai.

⁹Nuan merintah tasik ti begelumbang, lalu Nuan ngasuh gelumbang badu agi mangka.

¹⁰Nuan ngalahka Rahap[163] lalu munuh iya. Nuan ngalahka bala munsuh Nuan ngena pengering Nuan.

¹¹Serega endang enggi Nuan, lalu baka nya mega dunya. Nuan udah ngaga dunya enggau semua utai ti dalam iya.

¹²Nuan udah ngaga utara enggau selatan. Bukit Tabor enggau Bukit Hermon belagu gaga ati ke Nuan.

¹³Naka meh pemesai kuasa Nuan! Naka meh pengering Nuan!

¹⁴Perintah Nuan beduduk ba pengelurus enggau atur ti manah. Pengerindu enggau penetap ati Nuan nyata ba semua utai ti dikereja Nuan.

¹⁵Beberekat meh orang ke nyembah Nuan ngena lagu, orang ke diau dalam penampak penelap Nuan!

¹⁶Sida rami gaga sepemanjai hari ketegal Nuan, lalu sida muji Nuan ketegal pemadas Nuan.

¹⁷Nuan udah ngasuh kami menang. Ulih pengerindu Nuan, Nuan udah ngasuh kami menang.

¹⁸Nuan, O TUHAN, udah milih orang nyaga kami laban Nuan, O Allah Taala ti Kudus orang Israel, udah meri kami raja.

¹⁹Dalam genera dulu kelia, Nuan udah nyebut ngagai bala nembiak Nuan ke tetap ati, “Aku udah meri tulung ngagai siku soldadu ti tebilang nama. Aku udah meri kerusi diraja ngagai iya ti udah dipilih Aku ari orang mayuh.

²⁰ Aku udah nyiri nembiak Aku David nyadi raja lebuh Aku nata iya ngena minyak ti kudus.

²¹Pengering Aku deka seruran enggau iya. Kuasa Aku deka ngasuh iya kering.

²²Bala munsuh iya enda ulih ngelaban iya. Orang ke jai enda ulih ngalahka iya.

²³Aku deka nginsarka bala munsuh iya, lalu munuh semua orang ke begedika iya.

²⁴Aku deka rinduka iya sereta tetap ati ngagai iya. Aku deka ngasuh iya seruran menang.

²⁵Aku deka ngerembaika perintah iya kenyau ari Tasik Tengah nyentuk ngagai Sungai Eupratis.

²⁶Iya deka nyebut ngagai aku, ‘Nuan Apai enggau Allah Taala aku. Nuan Penyaga enggau Juruselamat aku.’

²⁷ Aku deka ngaga iya nyadi anak tuai Aku, ke bekuasa agi ari semua raja.

²⁸Aku deka seruran ngamatka semaya Aku enggau iya, lalu sempekat Aku enggau iya deka meruan belama iya.

²⁹Perintah iya deka meruan tan baka langit. Peturun iya deka betampung nyadi raja.

³⁰Tang enti peturun iya ngelanggar Adat Aku, lalu enda nitihka pesan Aku,

³¹enti sida enda ngasika atur Aku lalu enda nitihka pesan Aku,

³²Aku deka ngukum sida ketegal dosa sida. Aku deka ngasuh sida merinsa ketegal penyalah sida.

³³Tang Aku enda badu rinduka David lalu ngamatka semaya Aku enggau iya.

³⁴Aku enggai ngelanggar sempekat Aku enggau iya tauka matak sebarang semaya ti udah digaga Aku enggau iya.

³⁵Aku udah besemaya sekali aja dalam nama Aku ti kudus: Aku enggai sekali-kali bulaka David.

³⁶Iya deka meruan bisi peturun, lalu Aku deka ngemataka perintah iya seagi-agi mata hari manchar.

³⁷Perintah iya deka meruan tan belama iya baka bulan, ti nyadika saksi ti tetap ati di langit.”

³⁸Tang Nuan ringat ngagai raja ti udah dipilih Nuan. Nuan udah ninggalka iya lalu nulak iya.

³⁹Nuan udah mungkir ari sempekat Nuan enggau nembiak Nuan lalu nikauka makota iya ke tanah.

⁴⁰Nuan udah ngeruntuhka dinding kuta nengeri iya lalu ninggalka kuta iya nyadi tembawai.

⁴¹Semua orang ke mansa, ngenchuri utai iya. Semua orang ke berimbai pendiau enggau iya, ketawaka iya.

⁴²Nuan udah ngasuh bala munsuh iya menang. Nuan udah ngasuh sida lantang ati magang.

⁴³Nuan udah ngasuh senyata iya nadai tau diguna, lalu nejuka iya alah beperang.

⁴⁴Nuan udah ngerampas tungkat diraja[164] ari jari iya lalu nikauka kerusi diraja iya ke tanah.

⁴⁵Nuan udah ngasuh iya jampat tuai lalu ngemaluka iya.

⁴⁶TUHAN, kati Nuan deka ngelalaika Diri belama iya? Ni pengelama pengeringat Nuan agi mau baka api?

⁴⁷Kingatka pemandak umur aku. Kingatka Diri ti udah ngaga semua kami mensia!

⁴⁸Sapa ulih idup lalu enda mati? Baka ni ku kami mensia ulih nagang diri tama ngagai kubur?

⁴⁹TUHAN, dini alai tanda pengerindu Nuan? Dini alai semaya ti udah digaga Nuan enggau David?

⁵⁰Anang enda ingatka aku, ke nembiak Nuan, ke dipechat orang, ke natka diri disumpah semua[165] orang kapir.

⁵¹Bala munsuh Nuan mechat raja ti udah dipilih Nuan, O TUHAN! Sida mechat iya di sebarang endur iya bejalai.

⁵²Puji meh TUHAN belama iya! Amin! Amin!