Read Iban Masmur 9 Bible Online

Masmur 9 - Iban bible

Masmur 9

¹[13] Aku deka meri terima kasih ngagai TUHAN enggau pengabis ati aku. Aku deka nusui pasal semua utai ti badas ti udah dikereja Nuan.

²Aku deka gaga ati belagu ngemesaika Nuan. Aku deka belagu muji Nuan, Allah Taala ti Pemadu Bekuasa.

³Lebuh Nuan pegari, bala munsuh aku nikal, rebah lalu mati.

⁴Nuan endang lurus sereta betul ati lebuh Nuan ngakim, lalu pemutus penemu Nuan ngelantangka ati aku.

⁵Nuan udah ngukum semua bansa orang kapir lalu ngerusak orang ke jai. Sida nadai agi dikingatka.

⁶Munsuh kami abis lengis belama iya. Nuan udah ngerusak nengeri sida, lalu sida nadai agi dikingatka.

⁷Tang TUHAN endang Raja belama iya. Iya udah nudukka kerusi diraja Iya ba endur alai Iya ke ngakim.

⁸Iya merintah dunya ngena pengelurus. Iya ngakim semua bansa enggau lurus.

⁹TUHAN nyadi kuta alai orang ngenduh lebuh sida kena perinsa, nyadi kuta alai sida diau lebuh maya tusah.

¹⁰Orang ke nemu Nuan, TUHAN, deka manggaika pengarap sida ba Nuan. Nuan enda ninggalka orang ke datai ngagai Nuan.

¹¹Belagu pantun puji ke TUHAN ti diau di Sion! Tusui ngagai semua bansa utai ti udah dikereja Iya!

¹²Allah Taala ingatka orang ke merinsa. Iya nadai kala enda ingatka sabak sida, lalu Iya ngukum orang ke udah ngereja utai ti salah ngagai sida.

¹³ Kasihka aku, O TUHAN! Peda Nuan chara munsuh aku merinsaka aku! Selamatka aku ari pemati, O TUHAN,

¹⁴ngambika aku ulih bediri di mua orang di Jerusalem lalu madahka ngagai sida semua utai ti ngasuh aku muji Nuan, Aku deka rami gaga laban Nuan udah nyelamatka aku.

¹⁵Orang kapir udah labuh ngagai lubang kebung ti udah ditumbak sida empu; lalu kaki sida udah disintak jarin ti udah ditan sida empu.

¹⁶TUHAN udah mandangka Diri ngena pengelurus pemutus penemu Iya, lalu orang ke jai udah disintak pengawa ti dikereja jari sida empu.

¹⁷Orang ke jai, semua bansa ti enda ingatka Allah Taala, deka dibuai ngagai dunya pemati.

¹⁸Laban orang ke suntuk deka seruran dikingatka, lalu pengadang orang ke seranta enda lenyau belama iya.

¹⁹Datai meh Nuan TUHAN! Anang nejuka orang ngelaban Nuan! Awakka semua bansa orang kapir diakim Nuan.

²⁰Asuh sida takut, O TUHAN. Awakka sida nemu diri semina mensia aja.