Read Iban Masmur 91 Bible Online

Masmur 91 - Iban bible

Masmur 91

¹Barang sapa ke datai ngagai TUHAN ngiga pengelikun, barang sapa ke dijaga Iya ti Pemadu Bekuasa,

²tau nyebut ngagai Iya, “Nuan endang penyaga enggau pengelindung aku. Nuan endang Allah Taala aku. Aku manggaika pengarap aku ba Nuan.”

³Iya deka ngibun nuan likun ari semua penusah ti enda dipeda, enggau ari semua penyakit ti tau munuh.

⁴Iya deka mungkur nuan ngena sayap Iya. Nuan deka likun diibun Iya. Penetap ati Iya deka ngelindung sereta nyaga nuan.

⁵Anang nuan takutka utai ti tau ngemedis lebuh malam hari tauka diserang enggau ngenyit lebuh siang hari

⁶tauka penyakit ti nyerang dalam petang tauka utai ti jai ti munuh lebuh siang hari.

⁷Seribu iku deka rebah ngimbai nuan, sepuluh ribu iku ngelingi nuan, tang nuan enda bebadi.

⁸Nuan deka malik, lalu tepedaka chara orang ke jai diukum.

⁹Nuan udah ngasuh TUHAN nyaga nuan[167] lalu Allah Taala ti Pemadu Tinggi ngelindung nuan.

¹⁰Nya alai nuan enda ditinggang penusah, lalu pengachau pen nadai mega datai semak rumah nuan.

¹¹ Allah Taala deka ngasuh bala melikat Iya ngibun nuan lalu nyaga nuan di sebarang endur nuan bejalai.

¹² Sida deka nyambut nuan ngena jari sida ngambika kaki nuan enda terempas ba batu.

¹³ Nuan deka ngelunjak singa enggau ular, singa ti mangah enggau ular ti bisa.

¹⁴Ku Allah Taala bejaku, “Aku deka ngelepaska orang ke rinduka Aku lalu nyaga orang ke ngaku Aku nyadika TUHAN sida.

¹⁵Lebuh sida ngangauka Aku, Aku deka nyaut sida. Lebuh sida kena laban penusah, Aku deka enggau sida. Aku deka ngelepaska sida lalu masa sida.

¹⁶Aku deka ngupah sida ngena umur ti panjai. Aku deka ngelepaska sida.”