Read Iban Masmur 92 Bible Online

Masmur 92 - Iban bible

Masmur 92

¹[168] Naka meh pemanah meri terima kasih ngagai Nuan, O TUHAN, belagu ngemesaika Nuan, O Allah Taala ti Pemadu Tinggi,

²genap pagi madahka pengerindu Nuan ti meruan belama iya enggau genap malam madahka penetap ati Nuan,

³ngena musik ari engkeratung enggau belikan.

⁴Pengawa Nuan ti besai, O TUHAN, ngasuh ati aku gaga. Ketegal utai ti udah dikereja Nuan, aku belagu gaga ati.

⁵Naka meh pemesai kereja Nuan, O TUHAN! Naka meh penalam runding Nuan!

⁶ Nya utai ti enda ulih ditemu orang ke beli, ti enda ulih disagam orang ke lap.

⁷Orang ke jai nyangka ulih tumbuh baka rumput, orang ke ngereja penyalah nyangka tau nyadi kaya-raja, tang sida deka dirusak abis lengis,

⁸laban Nuan, TUHAN, endang bekuasa atas semua belama iya.

⁹Kami nemu munsuh Nuan deka mati, lalu semua orang ke jai deka alah magang.

¹⁰Nuan udah ngasuh aku kering baka sapi ti siga. Nuan udah merekatka aku enggau pengelantang.

¹¹Aku udah meda bala munsuh aku alah lalu ninga sabak orang ke jai.

¹²Orang ke lurus deka galak baka kayu engkerema. Sida deka tumbuh baka kayu sidar di menua Lebanon.

¹³Sida baka kayu ti ditanam dalam rumah TUHAN, ti galak dalam Rumah Sembiang Allah Taala kami,

¹⁴ti agi bebuah lebuh sida nyau tuai lalu seruran gadung sereta kering.

¹⁵Tu nunjukka TUHAN endang lurus ati, lalu nadai utai ti enda lurus ba penyaga aku.