Read Iban Jaku-dalam 1 Bible Online

Jaku-dalam 1 - Iban bible

Jaku-dalam 1

¹ Jaku-dalam Solomon, anak David, raja menua Israel.

²Tu jaku-dalam ti ulih nulung kita ngelala penemu-dalam enggau jaku lalau ti manah, sereta meretika ‘jaku tuai’ ti ngundan reti ti dalam.

³Jaku-dalam tu ulih ngajar kita pemintar idup, enggau jalai idup ngena ati ti betul, lurus sereta patut.

⁴Jaku-dalam tu ulih ngasuh orang ke kurang peneleba, bulih pemintar, sereta ngajar orang ke biak chakah ngereja pengawa.

⁵Jaku-dalam tu tau nambahka penemu orang ke endang bepenemu-dalam, lalu ngelalau orang ke bepelajar,

⁶ngambika sida ulih nemu reti utai ti dilalaika jaku-dalam, enggau pekara ti dibantaika orang ke bepenemu-dalam.

⁷ Nangika TUHAN nya pun penemu; orang ke beli ngeleseka penemu-dalam lalu enggai belajar.

⁸Anak, dingaka utai ti dipadahka apai indai nuan.

⁹Ajar ti diberi sida deka ngasuh perangai nuan manah agi, baka labung ti manah, tauka baka tenggak ti ngasuh gamal nuan sigat.

¹⁰Anak, lebuh orang ke bedosa nipu nuan, anang nurutka sida.

¹¹Enti sema sida bejaku munyi tu, “Aram kitai ngiga orang ngambika bisi dibunuh kitai! Aram kitai ngamuk orang ke nadai penyalah, kena kitai ngelantangka diri!

¹²Sida nyangka idup sereta bepengerai, lebuh kitai tetemuka sida, tang sida deka mati lebuh kitai udah ngamuk sida!

¹³Kitai deka tetemuka mayuh macham pengaya, lalu ngisi rumah kitai enggau perapasan!

¹⁴Aram mupuk enggau kami lalu bebagika utai ti ulih kitai enchuri.”

¹⁵Anak, anang nitihka orang ke baka nya. Anang begulai enggau sida.

¹⁶Sida enda tan nganti diri ti ngereja penyai. Sida endang seruran sedia deka munuh orang.

¹⁷Nadai guna nuan nan pukat lebuh burung ti deka ditangkap nuan nengkilaka nuan,

¹⁸tang orang ke baka nya semina nan panjuk kena nyintak diri empu, panjuk ti deka munuh sida.

¹⁹Pengawa ngerumpak endang selalu ngambi nyawa perumpak nya empu. Nya meh utai ti nyadi ba[1] orang ke idup ngena chara ti kasar.

²⁰ Dinga! Penemu-dalam benung ngangau ba sebelah jalai raya enggau ba sebelah pasar,

²¹ngangau ngena nyawa ti inggar ari pintu nengeri, enggau ari sebarang endur alai orang begempuru.

²²“Kita tu beli! Ni pengelama kita agi beli? Ni pengelama kita agi majak ngelese lalu begedika penemu?

²³Pendingka aku, lebuh aku nganu kita. Aku deka meri kita jaku lalau ti manah, lalu bekunsika penemu aku enggau kita.

²⁴Aku udah bebendar ngangauka kita, minta kita datai, tang kita enggai mending. Kita enggai mendingka aku.

²⁵Kita enggai mendingka semua jaku lalau aku, lalu enda kala ngelakka aku nunjukka jalai ti ngena ngagai kita.

²⁶Nya alai, lebuh kita dituntung penusah, aku deka ketawaka kita. Aku deka ngeleseka kita lebuh kita dituntung utai ti balat ngenakutka kita, [2]

²⁷lebuh iya datai baka biaubalai, lalu kita natka diri pedis sereta merinsa.

²⁸Nya baru kita deka ngangauka penemu-dalam, tang aku enggai nyaut. Kita nyangka begigaka aku di semua endur, tang kita enda tetemuka aku.

²⁹Kita nadai kala begunaka penemu, lalu kita seruran enggai ngasika TUHAN.

³⁰Kita nadai kala begunaka jaku lalau aku, tauka mendingka aku lebuh aku madahka penyalah kita.

³¹Nya alai, kita deka nerima utai ti endang patut diterima kita, lalu utai ti dikereja kita empu deka ngasuh kita sakit.

³²Orang ke nadai peneleba, mati, laban sida nulak penemu-dalam. Orang ke beli dirusak, laban sida enggai kiruh.

³³Tang barang sapa mendingka aku, deka bulih pengelikun. Iya deka diau likun, lalu nadai kebuah takut.”