Read Iban Jaku-dalam 10 Bible Online

Jaku-dalam 10 - Iban bible

Jaku-dalam 10

¹Tu jaku-dalam ti disebut Solomon: Anak ti bepenemu-dalam ngelantangka apai iya. Tang anak ti beli ngenusahka indai iya.

²Pengaya ti ulih nuan ngena chara ti jai, nadai mai penguntung ngagai nuan, tang ati ti betul ulih ngelepaska nuan ari pemati.

³TUHAN enggai nejuka orang ke lurus lapar, tang Iya deka nagang orang ke jai bulih utai ti dikinginka sida.

⁴Orang ke ngelusu deka diau seranta, tang orang ke bagas, deka nyadi kaya.

⁵Anak ti pintar ngetau lebuh musin panas, tang anak ke tinduk lebuh maya ngetau, mai pemalu.

⁶Orang ke lurus deka nerima berekat, tang mulut orang ke jai ngelalaika pemangah sida.

⁷Orang ke lurus deka dikingatka nyadi berekat, tang nama orang ke jai enda dikingatka agi.

⁸Orang ke mereti deka ngasika pesan, tang orang ke beli ke kutap-kutap ngapa, deka rusak.

⁹Orang ke lurus ati, diau likun, tang orang ke enda betul ati deka ditemu.

¹⁰Orang ke ngichekka mata, nyungkak pengachau nyadi, tang orang ke berani ngerara penyalah, mai pemaik.

¹¹Jaku orang ke lurus nyadika pun pengidup, tang jaku orang ke jai ngelalaika pemangah sida.

¹² Ati ti begedi nyungkak pengachau nyadi, tang pengerindu ngelamun semua penyalah.

¹³Penemu ti dalam ditemu ba mulut orang ke mereti, tang orang ke beli deka disipat.

¹⁴Orang ke bepenemu-dalam nugungka penemu, tang orang ke beli, ke bejaku kutap-kutap mai pengerusak datai semak.

¹⁵Pengaya nyaga orang ke kaya, tang penyeranta ngerusak orang ke miskin.

¹⁶Upah orang ke lurus nya pengidup, tang upah orang ke jai nya dosa.

¹⁷Orang ke mendingka ajar, nuju ngagai pengidup, tang orang ke enggai dirara, tesat.

¹⁸Orang ke ngelalaika ati diri ti begedi, nya orang ke bula, lalu orang ke bejaku jai pasal orang bukai, nya orang ke beli.

¹⁹Mayuh agi jaku disebut, mayuh agi penyalah, tang orang ke enda pejaku, nya orang ke pintar.

²⁰Jaku ti disebut orang ke lurus nya baka pirak ti tulin, tang runding orang ke jai, sigi nadai guna.

²¹Jaku ti disebut orang ke lurus, mai penguntung ngagai mayuh orang, tang orang ke beli mati laban pemeli diri.

²²Berekat ti diberi TUHAN, ngasuh kaya, lalu TUHAN nadai nambahka ati ti tusah enggau pengaya nya.

²³Orang ke beli rindu ngereja penyalah, baka ke bemain, tang orang ke mereti lantang ati ke ulah ti manah.

²⁴Utai ti diketakutka orang ke beli, deka nuntung iya, tang utai ti dikinginka orang ke lurus, deka diberi ngagai iya.

²⁵Lebuh biaubalai mansa, orang ke jai nadai agi, tang orang ke lurus deka tan belama iya.

²⁶Baka asai chuka ti ba ngeli, enggau asap ba mata, baka nya mega orang ke ngelusu, ba orang ke ngasuh iya gawa.

²⁷Nangika TUHAN, ngasuh umur panjai, tang orang ke jai deka pandak umur.

²⁸Pengadang orang ke lurus, mai ngagai pengaga, tang utai ti diadang orang ke jai, deka puntan.

²⁹TUHAN nyadika kuta ke orang ke lurus, tang ngerusak orang ke ngereja penyai.

³⁰Orang ke lurus deka diau tegap, tang orang ke jai enda diau di menua tu.

³¹Jaku orang ke lurus mai penemu-dalam, tang dilah ti nyebut utai ti jai, deka ditetak.

³²Orang ke lurus nemu utai ti patut disebut, tang orang ke jai nyebut utai ti jai.