Read Iban Jaku-dalam 11 Bible Online

Jaku-dalam 11 - Iban bible

Jaku-dalam 11

¹TUHAN begedika orang ke ngena dachin ti enda betul, tang Iya lantang ati ke timbang ti betul.

²Orang ke sumbung deka jampat dipechat. Enti nuan nemu ngemaruhka diri, nuan bepenemu-dalam.

³Enti nuan orang ke menyana, nuan diiring ati ti betul. Orang ke enda tau dikarapka, dirusak ati sida ti enda betul.

⁴Pengaya nadai pulai ke penguntung nuan lebuh nuan nyau deka mati, tang ati ti betul ulih ngelepaska nuan ari pemati.

⁵Ati ti betul ngasuh orang ke menyana nyamai agi diau, tang orang ke jai deka ngasuh diri empu alah.

⁶Pengelurus ngelepaska orang ke lurus ati, tang sida ke enda tau dikarapka, dipanjuk pengamu sida empu.

⁷Lebuh orang ke jai mati, pengadang sida sama mati enggau sida. Pengadang ti dipanggaika ba pengaya, sigi nadai mai penguntung.

⁸Orang ke lurus dilindung ari penusah, tang penusah nya deka ninggang orang ke jai.

⁹Jaku orang ke enda nangika Allah Taala, tau ngerusak nuan, tang penemu-dalam ari orang ke lurus, ulih ngelepaska nuan.

¹⁰Nengeri nyadi lantang lebuh orang ke lurus ati mujur ngereja pengawa, lalu orang manjung gaga ati lebuh orang ke jai mati.

¹¹Nengeri deka tampak nama lebuh orang ke lurus merekatka iya, tang jaku orang ke jai deka ngerusak nengeri nya.

¹²Bejaku mechat orang nya pengawa ti beli. Enti nuan amat pintar, nuan enda bemunyi.

¹³Orang ke chabul mulut enda tau dikarapka nyimpan resia, tang nuan tau ngarapka orang ke amat tau dikarapka.

¹⁴ Bansa deka alah enti iya nadai orang ngiring. Enti mayuh penyanding penemu, bansa deka diau likun.

¹⁵Enti nuan besemaya deka mayar utang orang ke enda dikelala nuan, nuan deka ngesal ila. Manah agi nuan enda malut diri enggau pekara nya.

¹⁶Indu ke nemu kasihka orang, patut dibasa, tang indu ke jai ulah, mai pemalu. Orang ke ngelusu enda tulihka duit,[7] tang orang ke bagas deka nyadi kaya.

¹⁷Nuan nyamai diau enti nuan nelap. Enti nuan jai enggau orang, nuan semina ngemediska diri empu.

¹⁸Orang ke jai nadai bulih utai, tang enti nuan ngereja utai ti ngena, nuan tetap deka diberi upah.

¹⁹Barang sapa keras deka ngereja utai ti ngena, deka idup, tang barang sapa majak ngereja utai ti salah, deka mati.

²⁰TUHAN begedika orang ke jai runding, tang rinduka orang ke ngereja utai ti ngena.

²¹Orang ke jai tetap deka diukum, tang orang ke lurus enda diukum.

²²Ba indu ke enda nemu berunding, pemajik nya baka tinchin emas ti ba junggur babi.

²³Utai ti dikinginka orang ke menyana, seruran mai penguntung. Lebuh orang ke jai bulih utai ti dikinginka sida, semua orang pedis ati magang.[8]

²⁴Orang siku meri enggau ati ti gerah mudah, tang iya nyadi lebih agi kaya. Siku ti bukai rangka, tang seruran suntuk.

²⁵Orang ke meri enggau ati ti gerah mudah, deka nyadi kaya-raja. Orang ke nulung orang bukai, deka bulih tulung ari orang.

²⁶Orang nyumpah orang ke besimpanka gandum nganti rega gandum niki, tang orang muji orang ke nyual gandum.

²⁷Enti juluk ati nuan manah, nuan deka dibasa orang, tang enti nuan ngiga pengachau, nuan deka bulih pengachau.

²⁸Orang ke manggaika diri ba pengaya, deka labuh baka daun lebuh musin ruruh, tang orang ke lurus deka galak baka daun lebuh musin panas.

²⁹Orang ke ngenusahka diri sebilik, deka abis semua utai. Orang ke beli deka seruran nyadi kuli orang ke pintar.

³⁰Pengelurus[9] deka meri pengidup, tang pemangah[10] deka muai pengidup.

³¹ Orang ke menyana deka bulih upah di dunya tu. Nya alai kita patut nemu, orang ke jai sereta bedosa deka diukum.