Read Iban Jaku-dalam 14 Bible Online

Jaku-dalam 14 - Iban bible

Jaku-dalam 14

¹Ruang bilik didirika ulih penemu-dalam sida ke indu, tang diruntuhka ulih pemeli.

²Orang ke betul ati ngayanka diri nangika TUHAN, tang orang ke enda betul ati, ngeleseka TUHAN.

³Orang ke beli sereta sumbung kelalu deka bejaku. Jaku orang ke bepenemu-dalam nyaga sida empu.

⁴Enti nuan nadai sapi ti lelaki kena narit pengeradu tanah, bilik setor nuan puang, tang enti nuan ngena sapi ti lelaki ngeradu tanah, bilik setor nuan deka penuh laban gandum.[14]

⁵Saksi ti tau dikarapka, endang selalu madahka utai ti bendar, tang saksi ti enda tau dikarapka, nadai nyebut utai bukai, tang semina nyebut utai ti bula aja.

⁶Orang ke ngenyumbungka diri, enda ulih nyadi orang ke bepenemu-dalam, tang orang ke nemu berunding, nyamai belajarka utai.

⁷Anang bepangan enggau orang ke beli, laban sida nadai utai ti tau diajar sida ngagai nuan.

⁸Nama kebuah orang ke pandai pintar? Laban iya nemu utai ti dikereja diri. Nama kebuah orang ke beli lap? Laban iya ngumbai diri nemu utai.

⁹Orang ke beli nadai bedulika diri bedosa, tang orang ke menyana minta diri diampun.[15]

¹⁰Pengaga ati nuan endang enggi nuan empu. Dendam nuan endang enggi nuan empu. Nadai orang ulih bempu utai nya enggau nuan.

¹¹Rumah orang ke menyana deka mengkang bediri, tang rumah orang ke ngereja penyai dirusak.

¹² Jalai ti dikumbai nuan jalai ti ngena, tau nuju ngagai pemati.

¹³Ketawa tau ngelalaika ati ti tusah. Lebuh ati ti lantang nyau nadai agi, ati ti tusah deka seruran bisi.

¹⁴Orang ke jai deka bulih utai ti setipak enggau penyai iya. Orang ke menyana deka diupah ketegal utai ti dikereja sida.

¹⁵Orang ke beli deka arapka sebarang utai, tang orang ke pintar deka nyingkang enggau bejimat.

¹⁶Orang ke mereti endang bejimat, ngambika sida enda kena laban penusah. Orang ke beli kelalu beguai-guai sereta enda berunding ngereja utai.

¹⁷Orang ke lengkar ngereja utai ti beli. Orang ke bepenemu-dalam mengkang enda ringat.[16]

¹⁸Orang ke nadai nemu utai, bulih utai ti setipak enggau pemeli sida, tang orang ke pandai diupah enggau penemu.

¹⁹Orang ke jai deka meremi ngagai orang ke lurus, lalu ngemaruhka diri minta kasih ari sida.

²⁰Nadai orang deka rinduka orang ke seranta. Indah orang ke berimbai pendiau enggau sida deh enda rinduka sida, tang orang ke kaya mayuh pangan.

²¹Enti nuan deka lantang ati, nuan enda tau enda nelap enggau orang ke seranta. Nuan bedosa enti nuan ngeleseka orang.

²²Nuan deka dikarapka sereta dibasa orang, enti nuan ngereja utai ti manah. Enti nuan bekereja ngulihka penyai, nuan ngereja utai ti salah.

²³Enti nuan gawa, nuan deka bulih pengidup. Enti nuan duduk berandau ngapa, nuan deka idup seranta.

²⁴Orang ke bepenemu-dalam diupah ngena pengaya, tang orang ke beli deka dikelala ari pemeli sida.

²⁵Orang ke nyadika saksi ngidupka nyawa lebuh iya madahka utai ti bendar. Lebuh iya madahka utai ti bula, iya nyual orang.

²⁶Nangika TUHAN meri ati ti kempang enggau pengelikun ngagai orang enggau sida sebilik.

²⁷Kati nuan deka nyeliahka pemati? Ati ti nangika TUHAN nya pun pengidup.

²⁸Pemesai nama raja bepanggai ba pemayuh orang ke diperintah iya. Enti iya nadai orang diperintah, iya nadai guna.

²⁹Enti nuan enda jampat ringat, reti nya nuan orang ke bepenemu-dalam, tang enti nuan jampat ringat, nuan semina mandangka pemeli diri.

³⁰Ati ti lantang, ngasuh tubuh nuan bepengerai, tang ati ti kepapas baka penyakit riman.

³¹Enti nuan nekanka pengidup orang ke seranta, nuan ngeleseka Allah Taala ti ngaga sida. Tang enti nuan nelap enggau orang ke seranta, reti nya nuan nyembah Allah Taala.

³²Orang ke jai ngasuh sida empu labuh ngena penyai ti dikereja sida, tang orang ke menyana dijaga ati sida ke rentang.[17]

³³Penemu-dalam endang bisi dalam semua runding orang ke nemu berunding, tang orang ke beli nadai penemu-dalam.

³⁴Pengelurus ngemesaika nama bansa. Dosa mai pemalu ngagai bansa.

³⁵Raja gaga ati ke bala pemesai ti landik gawa, tang iya ngukum sida ke enda ngereja utai ti diasuh iya.