Read Iban Jaku-dalam 15 Bible Online

Jaku-dalam 15 - Iban bible

Jaku-dalam 15

¹Saut ti nelap ngasuh orang badu agi ringat, tang jaku ti kasar ngasuh orang ringat.

²Lebuh orang ke bepenemu-dalam bejaku, sida ngaga penemu manah didinga, tang orang ke beli mantaika penemu ti nadai reti.

³TUHAN meda utai ti nyadi di semua endur. Iya nengkilaka kitai, nemuka kitai ngereja utai ti manah tauka ngereja utai ti jai.

⁴Jaku ti siru mai pengidup, tang jaku ti jai ngelemika semengat.

⁵Nuan beli enti nuan enggai mendingka ajar apai indai nuan, tang nuan bepenemu-dalam enti nuan nerima jaku rara enggau ajar ari sida.

⁶Orang ke lurus nemu nyimpan pengaya sida, tang orang ke jai ngelenyauka pengaya sida lebuh maya suntuk.

⁷Penemu disiburka orang ke bepenemu-dalam, ukai disiburka orang ke beli.

⁸TUHAN gaga ati lebuh orang ke menyana besampi, tang Iya begedika piring ti dibai orang ke jai.

⁹TUHAN begedika ulah orang ke jai, tang rinduka orang ke ngereja utai ti ngena.

¹⁰Enti nuan ngereja penyalah, nuan deka balat diukum. Nuan deka mati, enti nuan enggai diajar.

¹¹Indah dunya pemati deh enda ulih nagang TUHAN nemu utai ti dalam iya. Nya alai, baka ni ku kitai ulih ngelalaika runding kitai ari Allah Taala?

¹²Orang ke sumbung enggai ditunjukka orang penyalah. Sida nadai kala minta jaku lalau ari orang ke dalam agi penemu ari sida.

¹³Lebuh orang lantang ati, sida tuchum, tang lebuh ati sida enda lantang, mua sida berupai tusah.

¹⁴Orang ke mereti, begigaka penemu, tang mulut orang ke beli beridup ba pemeli.

¹⁵Orang ke seranta endang seruran merinsa diau, tang orang ke lantang ati endang seruran nyamai diau.

¹⁶Manah agi diau seranta lalu nangika TUHAN, ari ti nyadi kaya tang bisi penusah.

¹⁷Manah agi makai sayur begulai enggau orang ke dikerinduka nuan, ari ke makai dagin ti pemadu nyamai tang ati seruran begedi.

¹⁸Ati ti lengkar ngasuh bekelikuh, tang ati ti liat mai pemaik.

¹⁹Enti nuan ngelusu, nuan deka tusah idup di semua endur, tang enti ati nuan betul, nuan nadai utai ngenusah.

²⁰Anak ti bepenemu-dalam ngelantangka apai. Tang orang ke beli nadai basa enggau indai diri.

²¹Orang ke beli gaga ke pemeli, tang orang ke bepenemu-dalam deka ngereja utai ti ngena.

²²Enggau naka ulih giga semua jaku lalau, nya baru nuan deka mujur. Enti nuan nadai bulih jaku lalau, pengawa nuan deka puntan.

²³Naka meh pengaga tetemuka leka jaku ba maya ti ngena.

²⁴Orang ke bepenemu-dalam niti jalai ti nuju ke atas ngagai pengidup, ukai niti jalai ti nuju ke baruh ngagai pemati.

²⁵TUHAN deka ngerusak rumah orang ke sumbung, tang Iya deka nyaga reta tengkira indu ke balu.

²⁶TUHAN begedika runding ti jai, tang Iya rinduka jaku ti siru.

²⁷Enti nuan nguji ngulihka penguntung ngena jalai tipu, ruang bilik nuan empu deka rusak. Anang makai suap, nya baru umur nuan deka panjai agi.

²⁸Orang ke menyana berunding dulu sebedau sida nyaut. Orang ke jai jampat nyaut, tang saut sida mai penusah.

²⁹Lebuh orang ke menyana besampi, TUHAN mendingka sida, tang TUHAN enda mendingka orang ke jai.

³⁰Mua ti tuchum ngasuh nuan lantang ati, lalu berita ti manah ngasuh ati nuan berasai nyamai agi.

³¹Enti nuan mending lebuh orang ngajar nuan, reti nya nuan bepenemu-dalam.

³²Enti nuan enggai diajar, nuan ngemediska diri empu. Enti nuan nerima jaku ti nunjukka penyalah nuan, nuan deka lebih agi bepenemu-dalam.

³³Bebasaka TUHAN nya pelajar ti manah. Nuan enda tau enda baruh ati, sebedau nuan bulih basa.