Read Iban Jaku-dalam 16 Bible Online

Jaku-dalam 16 - Iban bible

Jaku-dalam 16

¹Mensia nyangka begagaka pelan, tang TUHAN ti meri pemutus penemu.[18]

²Nuan nyangka ngumbai semua utai ti dikereja nuan ngena magang, tang TUHAN Empu ke meresa juluk ati nuan.

³Serahka utai ti dikereja nuan[19] ngagai TUHAN, nya baru pelan nuan deka mujur.

⁴Semua utai ti udah digaga TUHAN endang bisi tuju magang, lalu tuju orang ke jai nya pengerusak.

⁵TUHAN begedika semua orang ke sumbung. Iya enggai sekali-kali nejuka sida enda diukum.

⁶ Taluk sereta tetap ati, nya baru dosa nuan diampun. Ngasika TUHAN, nya baru nuan enda dituntung utai ti jai.

⁷Lebuh nuan ngerinduka ati TUHAN, nuan ulih ngaga[20] munsuh nuan nyadi pangan.

⁸ Manah agi bulih duit mimit ngena chara ti lurus, ari ke bulih mayuh duit ngena chara ti enda lurus.

⁹Nuan nyangka ngaga pelan, tang TUHAN ti ngatur utai ti dikereja nuan.

¹⁰Raja bejaku ngena kuasa ti diberi Allah Taala. Pemutus penemu iya endang seruran ngena.

¹¹TUHAN ngasuh nuan ngena dachin enggau takar ti betul, lalu anang ngelakar lebuh nuan bejual.

¹²Raja enggai meda penyai,[21] laban utai ti ngasuh perintah kering nya pengelurus.

¹³Raja keran deka ningaka utai ti ngena, lalu deka rinduka orang ke nyebut utai ti ngena.

¹⁴Orang ke bepenemu-dalam deka nguji ngelantangka ati raja. Enti raja ringat, orang bisi deka kena bunuh.

¹⁵Pengasih raja nya baka mua hari ti mai ujan lebuh musin bungai: iya meri pengidup.

¹⁶Manah agi bisi penemu-dalam enggau penemu, ari ke bisi emas enggau pirak.

¹⁷Orang ke menyana, ngelaungka penyai. Nya alai bejimat - laban nya nyangka ulih ngidupka nyawa nuan.

¹⁸Penyumbung nuju ngagai pengerusak, lalu ati ti tinggi ngasuh nuan rebah.

¹⁹Manah agi ngembuan ati ti baruh lalu diau seranta, ari ti sumbung lalu enggau orang bekunsika perapasan.

²⁰Peratika utai ti diajar ngagai nuan, nya baru nuan deka mujur. Arapka TUHAN, nya baru nuan deka lantang.

²¹Orang ke bepenemu-dalam sereta tuai runding, deka tampak nama laban iya nemu meretika utai. Manah agi jalai jaku iya, rindu agi ga orang nitihka iya.

²²Ba orang ke pintar, penemu-dalam nya pun pengidup, tang nuan semina masau jam ngapa ngajar orang ke beli.

²³Orang ke bepenemu-dalam, berunding dulu sebedau sida bejaku. Utai ti disebut sida dipendingka orang magang.

²⁴Jaku ti siru nya baka ai manyi - manis sereta manah ke pengerai nuan.

²⁵ Jalai ti dikumbai nuan ngena, tau nuju ngagai pemati.

²⁶Perut ti lapar ngasuh orang bebendar agi gawa, laban iya keran deka bisi utai diempa.

²⁷Orang ke jai begigaka jalai ngemediska orang. Indah leka jaku ti disebut iya deh jai magang.

²⁸ Orang ke jai bejakuka orang. Sida nyungkak pengachau nyadi lalu mechahka kaul entara pangan.

²⁹Orang ke mangah nipu pangan, lalu mai sida ngagai penusah.

³⁰Bejaga ari orang ke tuchum sereta ngichekka mata ngagai nuan; sida udah berundingka utai ti jai.

³¹Upah orang ke lurus nya umur ti panjai; bulu pala ti buban nya makota ti bemulia.

³²Manah agi ngembuan ati ti liat, ari ke ngembuan kuasa, lalu manah agi enti nuan ulih merintah ati diri, ari nuan ti ngalahka nengeri.

³³Orang bechabut undi kena ngiga peneka Allah Taala, tang Allah Taala empu ke meri pemutus penemu.