Read Iban Jaku-dalam 17 Bible Online

Jaku-dalam 17 - Iban bible

Jaku-dalam 17

¹Manah agi makai kerak roti tang bisi pemaik dalam ati, ari ke rami makai besai dalam rumah ti penuh laban pengachau.

²Orang gaji ti pintar deka bekuasa atas anak tuan iya ti nadai guna, lalu nerima sebagi ari pesaka tuan iya.

³Emas enggau pirak diuji ngena api, lalu ati orang diuji TUHAN.

⁴Orang ke jai mendingka penemu ti jai, lalu orang ke bula mendingka pemula.

⁵Enti nuan beduan orang ke seranta, nuan ngeleseka Allah Taala ti ngaga sida. Nuan deka diukum, enti nuan gaga meda orang kena laban penusah.

⁶Aki temegahka uchu diri, baka anak ke temegahka apai indai sida.

⁷Orang ke dibasa orang, enda nusui utai ti bula, lalu orang ke beli nadai nyebut utai ti menyana.

⁸Sekeda orang ngumbai makai suap nya baka kereja ajih. Sida ngarapka diri ulih ngereja semua utai.

⁹Enti nuan deka ngasuh orang rinduka nuan, ampun sida lebuh sida ngereja utai ti salah ngagai nuan. Enti nuan seruran ingatka penyalah sida, kaul entara kita deka rusak.

¹⁰Orang ke pintar bulih agi pelajar ari jaku anu, ari orang ke beli, ke disipat seratus kali.

¹¹Pemati deka datai baka seruan ti jai, ngagai orang ke jai, ke semampai nyungkak pengachau nyadi.

¹²Manah agi betemu enggau indu beruang ti udah lenyau anak, ari ke betemu enggau orang ke beli, ke ngiruh diri ngereja pengawa ti nadai reti.

¹³Enti nuan malas pemanah ngena penyai, nuan enda ulih muai penyai ari rumah nuan.

¹⁴Pun kelikuh nya baka tekat ai ti baru deka runtuh. Padamka kelikuh nya enggau jampat.

¹⁵Ngukum orang ke nadai penyalah, tauka ngelepaska orang ke jai, nya pengawa ti sama dipegedika TUHAN.

¹⁶Nadai guna orang ke beli bekenaka duit ngulihka pelajar, laban iya enda nemu berunding.

¹⁷ Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?

¹⁸Semina orang ke enda nemu berunding aja ti deka besemaya betanggungjawapka utang orang bukai.

¹⁹Reti rinduka dosa nya rindu ngaga pengachau. Enti nuan seruran temegah,[22] reti nya nuan minta penusah.

²⁰Barang sapa berundingka utai ti jai, lalu bejakuka pasal penyai, nadai ulih ngarapka diri ulih tetemuka utai ti manah, tang semina penusah aja.

²¹Apai indai ke bisi anak ti ngereja utai ti beli, nadai utai bukai tang semina ati ti tusah sereta sinu.

²²Ati ti selalu lantang ngasuh nuan bepengerai. Ati ti selalu tusah deka ngasuh nuan mupuk mati.

²³Hakim ti jai belalai makai suap, lalu atur ti lurus enda dipejalaika.

²⁴Tuju orang ke pintar nya ngulihka penemu-dalam, tang orang ke beli nadai meruan tuju.

²⁵Anak ke beli ngenusahka ati apai, sereta ngemaluka indai.

²⁶Kitai enda patut ngukum orang ke nadai penyalah, tauka orang ke ngereja utai ti ngena.

²⁷Orang ke mereti, enda seruran kutap-kutap. Orang ke enda bemunyi nya orang ke bepenemu-dalam.

²⁸ Indah orang ke beli deh kadang-kadang dikumbai bepenemu-dalam sereta nemu berunding, enti sida enda bejaku.