Read Iban Jaku-dalam 18 Bible Online

Jaku-dalam 18 - Iban bible

Jaku-dalam 18

¹Orang ke enda nemu begulai enggau orang bukai, semina berundingka diri empu aja. Sida enda besetuju enggau semua utai ti dikumbai orang bukai ngena.

²Orang ke beli enda beduli sekalika iya mereti tauka enda. Iya semina keran deka ngayanka pemintar diri aja.

³Dosa enggau pemalu endang begulai. Enti orang enda agi bebasaka nuan, sida ngeleseka nuan.

⁴Jaku orang tau meri penemu, ti dalam baka tasik, sereta chiru baka ai sungai.

⁵Kitai salah enti kitai ngeringka orang ke salah, lalu nagang orang ke nadai penyalah nerima atur ti lurus.

⁶Lebuh orang ke beli ngepunka kelikuh, iya minta diri dipalu orang.

⁷Lebuh orang ke beli mansutka jaku, iya ngerusak diri empu. Iya dipanjuk jaku diri empu.

⁸Pengawa ti bejakuka orang asai ti nyamai. Naka meh pemalat ati kitai tetenguk deka nelan iya!

⁹Orang ke ngelusu endang jai. Iya baka orang ke rindu ngerusak utai.

¹⁰TUHAN baka menara ti tegap, endur alai orang ke lurus tau datai lalu diau enggau likun.

¹¹Tang orang ke kaya ngumbai pengaya sida ulih nyaga sida, baka dinding kuta ti tinggi sereta tegap, ti ngelingi nengeri.

¹²Nadai orang tau bulih basa enti iya enda ngemaruhka diri. Orang ke sumbung endang bejalai ngagai pengerusak.

¹³ Mending dulu sebedau nuan nyaut. Enti nuan enda mending dulu, nuan beli sereta enda nemu bebasaka orang.

¹⁴Pengeras nuan deka idup ulih ngasuh nuan tan lebuh nuan sakit, tang enti nuan ngelengkaka pengeras ati nuan nya, nuan nadai utai diadang agi.

¹⁵Orang ke nemu berunding endang seruran gagit ati sereta sedia deka belajar.

¹⁶Kati nuan deka betemu enggau orang ke tinggi pangkat? Bai pemeri, nya baru nuan nyamai betemu enggau iya.

¹⁷Orang ke terubah mansutka jaku dalam kot endang munyi ti ngena belama, sebedau orang ke ngelaban iya belabuh nanya iya.

¹⁸Enti dua iku orang ke sama bekuasa belaban dalam kot, seduai iya tau bechabut undi kena seduai iya mutuska pekara nya.

¹⁹Tulung kaban belayan nuan, nya baru sida deka nyaga nuan baka dinding kuta nengeri ti tegap, tang enti nuan belaya enggau sida, sida deka nikupka pintu sida lalu enggai ngemendarka nuan tama.

²⁰Nuan deka betanggungjawapka utai ti deka nyadi ketegal semua jaku ti disebut nuan.

²¹Utai ti disebut nuan tau ngidup tauka ngerusak nyawa. Nya alai nuan enda tau enda betanggungjawapka utai ti deka nyadi ba nuan ketegal jaku nuan empu.

²² Enti nuan bulih bini, nuan bulih utai ti manah. Nya ngayanka TUHAN manah enggau nuan.

²³Lebuh orang ke seranta bejaku, sida enda tau enda bejaku enggau penuh basa, tang lebuh orang ke kaya nyaut, sida bejaku sumbung.

²⁴Sekeda orang bepangan [23] enda lama aja, tang sekeda pangan taluk agi ari menyadi diri.