Read Iban Jaku-dalam 19 Bible Online

Jaku-dalam 19 - Iban bible

Jaku-dalam 19

¹Manah agi seranta tang ngembuan ati ti betul, ari ti beli sereta bula.

²Semina ransing aja enda chukup enti kita nadai penemu. Enti kita enda liat ati, kita deka kena laban penusah.

³Sekeda orang ngerusak diri empu ngereja pengawa ti beli, lalu udah nya besalah TUHAN.

⁴Orang ke kaya endang selalu bulih pangan ti baru, tang orang ke seranta dilengkaka pangan sida empu.

⁵Enti nuan nusui utai ti bula dalam kot, nuan deka diukum - nuan enda ulih nyeliahka ukum nya.

⁶Semua orang nguji ngulihka ati orang ke tinggi pangkat. Semua orang deka bepangan enggau orang ke meri sida utai.

⁷Indah kaban belayan orang ke seranta deh enda nemu begunaka iya. Nya alai patut ga iya nadai pangan. Bebendar ni pen iya ngiga pangan, nadai ga iya tetemuka orang ke deka nyadi pangan iya.

⁸Kasihka diri empu lalu belajar enggau naka ulih. Udah nya kingatka utai ti dipelajarka nuan. Nya baru nuan deka nyadi kaya-raja.

⁹Nadai orang ke bula dalam kot ulih nyeliahka ukum. Iya nadai penyadi agi.

¹⁰Orang ke beli enda patut diau nyamai, lalu ulun enda patut merintah orang ke peturun raja.

¹¹Enti nuan orang ke mereti, nuan deka nagang diri lengkar. Lebuh orang ngereja utai ti salah ngagai nuan, nuan deka dipuji orang enti nuan enda bedulika penyalah nya.

¹²Pengeringat raja sebaka enggau penginggar singa ti negung, tang pengasih iya baka ujan.

¹³Anak ke beli ngerusak apai indai sida. Bini ke ituk sebaka munyi enggau ai ti enda ngetu nitik.

¹⁴Orang tau bulih rumah enggau duit ari apai indai, tang semina TUHAN siku aja ke ulih meri bini ti mereti.

¹⁵Awakka nuan majak ngelusu. Tinduk meh nuan, tang nuan deka lapar.

¹⁶Titihka adat Allah Taala lalu nuan deka panjai agi umur. Enti nuan enda ngasika adat nya, nuan deka mati.

¹⁷Lebuh nuan meri utai ngagai orang ke seranta, nuan baka ke nyali utai ngagai TUHAN, lalu TUHAN deka mayar nuan.

¹⁸Disiplin anak nuan lebuh sida agi biak lalu udah nemu meretika utai. Enti nuan enda, nuan nulung sida ngerusak diri empu.[24]

¹⁹Enti orang lengkar, awakka iya betanggungjawapka utai ti nyadi ketegal pengelengkar iya empu. Enti nuan ngelepaska iya ari penusah iya sekali, nuan deka ngelepaska iya baru.[25]

²⁰Pendingka jaku lalau, lalu terima jaku ajar, ngambika nuan bulih penemu-dalam kena nuan idup jemah ila.

²¹Mensia nyangka bekiraka mayuh macham pelan, tang semina peneka TUHAN aja deka nyadi.

²²Kitai patut nemu malu ke pengamu diri.[26] Orang ke seranta lantang agi diau ari orang ke bula.

²³Enti nuan nangika TUHAN, nuan deka panjai umur, idup puas ati sereta nadai kena laban utai ti tau ngemedis.

²⁴Sekeda orang kelalu ngelusu datai ke sida nyau enda tesuapka pemakai.

²⁵Penyumbung patut diukum, ngambika orang ke nadai nemu utai, ulih belajar ari nya. Enti nuan bepenemu-dalam, nuan deka mereti lebuh nuan diajar.

²⁶Semina orang ke enda nemu malu sereta enda nemu bebasa, deka merinsaka apai diri, tauka muru indai iya ari rumah.

²⁷Anak, lebuh nuan badu belajar, nuan deka jampat enda ingatka utai ti udah ditemu nuan.

²⁸Enti orang ke nyadika saksi keran deka ngemediska orang, atur ti lurus enda ulih dipejalaika. Orang ke jai endang rinduka penyai.

²⁹Orang ke sumbung sereta beli, tetap deka dipalu.