Read Iban Jaku-dalam 2 Bible Online

Jaku-dalam 2 - Iban bible

Jaku-dalam 2

¹Anak, pelajarka utai ti diajar aku ngagai nuan, lalu anang enda ingatka utai ti diasuh aku kereja nuan.

²Pendingka penemu-dalam lalu uji meratika utai nya.

³Pinta meh penemu. Pinta meh runding ti dalam.

⁴Giga iya enggau naka ulih nuan baka ke ngiga pirak tauka pengaya ti dilalaika.

⁵Nya baru nuan deka nemu reti nangika TUHAN, lalu nuan deka mujur belajarka pasal Allah Taala.

⁶ Penemu-dalam nya utai ti diberi TUHAN. Penemu enggau pemereti ati endang datai ari Iya.

⁷Iya nulung sereta nyaga orang ke lurus sereta betul ati.

⁸Iya nyaga orang ke manah enggau orang bukai, lalu nyaga orang ke angkunka Iya.

⁹Enti nuan mendingka aku, nuan deka nemu utai ti ngena, lurus sereta betul. Nuan deka nemu utai ti patut dikereja nuan.

¹⁰Nuan deka nyadi orang ke bepenemu-dalam, lalu penemu nuan deka ngasuh ati nuan gaga.

¹¹Pemintar runding enggau pemereti ati nuan deka nyaga nuan,

¹²nagang nuan ngereja utai ti salah. Sida deka ngejangka nuan jauh ari orang ke numbuhka pengachau ngena utai ti disebut sida,

¹³iya nya, sida ke udah ngelengkaka pengidup ti lurus, lalu diau dalam pemetang,

¹⁴ke ngelantangka diri ngereja utai ti salah, lalu gaga ati ngereja penyai,

¹⁵orang ke enda tetap ati sereta enda tau dikarapka.

¹⁶Nuan ulih nulak indu ke kamah ulah, ke nguji ngulihka nuan ngena jaku ti manis,

¹⁷indu ke enda tetap ati ngagai laki diri, sereta enda ingatka semaya ti kudus ti udah digaga iya.

¹⁸Enti nuan mansang ngagai rumah indu nya, nuan niti jalai ti nuju ngagai pemati. Enti nuan mansang kia, nuan mansang ngagai dunya pemati.

¹⁹Orang ke nemuai ngagai iya enda ulih pulai agi. Orang nya enda ulih pulai agi ngagai jalai ti nuju ngagai pengidup.

²⁰Nya alai nuan enda tau enda beteladan ba orang ke menyana, lalu diau lurus.

²¹Orang ke lurus, orang ke rentang ati, deka diau di menua kitai.

²²Tang Allah Taala deka muai orang ke jai ari menua tu, lalu nyabut orang ke bedosa ari menua tu baka ke nyabut rumput ari tanah.