Read Iban Jaku-dalam 20 Bible Online

Jaku-dalam 20 - Iban bible

Jaku-dalam 20

¹Enti nuan kelalu ngirup, nuan deka ragak sereta beli. Kitai beli enti kitai nejuka diri mabuk.

²Takutka raja ke ringat nya baka ke takutka singa ti negung. Enti kitai nyungkak iya ringat, kitai semina munuh diri.

³Orang ke beli nemu ngepunka kelikuh, tang utai ti manah dikereja nya ngejangka diri jauh ari kelikuh nya.

⁴Orang bumai ke ngelusu lalu enda ngeradu tanah umai diri ba maya ti patut, nadai utai diketau.

⁵Runding mensia baka ai ti ba telaga ti dalam, tang orang ke ngembuan runding ti dalam, ulih ngauk ai nya.

⁶Semua orang bela madahka penaluk enggau penetap ati diri, tang uji giga orang ke endang amat taluk sereta tetap ati!

⁷Bala anak amat diberekatka enti sida bisi apai ke lurus ati, sereta ngereja utai ti ngena.

⁸Raja duduk ngakim, lalu iya ngelala penyai lebuh iya meda penyai.

⁹Kati orang ulih ngumbai diri nadai udah ngereja penyalah, lalu ngumbai semua dosa iya udah dibuai magang?

¹⁰TUHAN begedika orang ke ngena timbang enggau takar ti enda betul.

¹¹Indah anak mit deh nemu ngayanka pendiau diri ari utai ti dikereja sida. Kita nemu enti sida nya betul ati sereta manah.

¹²TUHAN udah meri kitai mata kena meda, enggau pending kena mending.

¹³Enti nuan selalu tinduk, nuan deka nyadi orang ke seranta. Enti nuan seruran bekereja, nya baru nuan deka mayuh utai diempa.

¹⁴Orang ke meli utai endang selalu mutap madahka rega utai nya kelalu mar, tang udah nya iya mupuk lalu temegahka diri nemu betawar.

¹⁵Enti nuan nemu utai ti dikejakuka nuan, nuan bisi utai ti lebih agi berega ari emas tauka batu ti berega.

¹⁶Barang sapa besemaya deka betanggungjawapka utang orang kampar, patut nyerahka reta tengkira diri kena nyamin utang nya.

¹⁷Utai ti ulih nuan ngena jalai tipu, tau ngasuh nuan gaga ati baka ke makai pemakai ti pemadu nyamai, tang lama laun utai nya deka baka asai pasir dalam nyawa nuan.

¹⁸Giga jaku lalau ti manah, nya baru nuan deka mujur. Anang mansang beperang enti nuan apin ngaga pelan dulu.

¹⁹Orang ke chabul mulut enda ulih nyimpan resia. Nya alai anang begulai enggau orang ke kelalu deka bejaku.

²⁰Enti nuan nyumpah apai indai nuan, seput nuan deka padam baka lampu ti padam dalam petang.

²¹Makin mudah agi nuan bulih pengaya, makin kurang agi ga guna pengaya nya ba nuan.

²²Anang malas penyai ngena penyai. Panggaika pengarap nuan ba TUHAN, nya baru Iya deka nulung nuan.

²³TUHAN begedika orang ke ngena dachin enggau timbang ti enda betul.

²⁴TUHAN udah nentuka jalai ti deka ditengah kitai. Nya alai, kati ku orang ulih meretika tuju pengidup diri?

²⁵Berunding enggau manah sebedau nuan besamaya deka ngenjuk piring ngagai Allah Taala, enggai ke nuan ngesal ila.

²⁶Raja ti bepenemu-dalam deka nemu sapa ti ngereja penyalah, lalu iya deka ngukum orang nya enggau nadai pengasih.

²⁷TUHAN udah meri kitai runding enggau ati ti nemu ngelala utai ti manah enggau utai ti jai. Kitai enda ulih ngelalaika diri ari kitai empu.

²⁸Raja deka mengkang megai perintah seagi-agi iya merintah enggau ati ti betul, lurus sereta manah.

²⁹Kitai muji pengering sida ke agi biak, lalu kitai masa orang ke buban bulu pala.

³⁰Kadang-kadang kitai semina ngubah ulah diri lebuh kitai udah ngasaika pemedis.