Read Iban Jaku-dalam 21 Bible Online

Jaku-dalam 21 - Iban bible

Jaku-dalam 21

¹TUHAN ngatur runding raja, ngemudah Iya ke ngatur arus sungai.

²Nuan nyangka ngumbai semua utai ti dikereja nuan ngena magang, tang ingat: TUHAN meresa juluk ati nuan.

³Kereja aja utai ti ngena sereta manah. Utai nya ngerinduka ati TUHAN, lebih agi ari piring ti dibai ngagai Iya.

⁴Orang ke jai diperintah ati ti sumbung sereta tinggi. Nya dikumbai bedosa.

⁵Bejimat lebuh nuan ngaga pelan, nya baru nuan deka bulih mayuh utai. Enti nuan kelalu beguai-guai ngereja utai, nuan nadai kala chukup utai.

⁶Pengaya ti ulih nuan ngena jalai tipu, deka jampat lesap, tang semina lebuh iya udah mai nuan ngagai pemati.

⁷Orang ke jai deka diukum ketegal pemangah sida, laban sida enggai ngereja utai ti ngena.

⁸Orang ke ngereja penyalah endang bula magang, tang orang ke nadai penyalah, ngereja utai ti ngena.

⁹ Manah agi diau ba perabung rumah ari ti diau enggau bini ke ituk.

¹⁰Orang ke jai endang seruran inginka penyai. Sida nadai nemu kasihka orang.

¹¹Lebuh orang ke sumbung diukum, orang ke enda nemu berunding bulih pelajar ari nya. Orang ke bepenemu-dalam deka bulih pelajar ari utai ti diajar ngagai iya.

¹²Allah Taala ti Lurus, nemu utai ti nyadi dalam rumah orang ke jai, lalu Iya deka ngerusak orang ke jai nya.

¹³Enti nuan enggai mendingka sabak orang ke seranta, sabak nuan empu ti minta tulung enda mega didingaka.

¹⁴Enti orang ringat ngagai nuan, pemeri ti diberi nuan ngena jalai belalai deka ngasuh iya badu agi ringat.

¹⁵Lebuh atur ti lurus udah dipejalaika, orang ke menyana deka gaga ati, tang orang ke jai deka tusah ati.

¹⁶Pemati endang meruan nganti orang ke limpang ari runding ti manah.

¹⁷Ngelantangka diri ngena pengaya, ngena wain, enggau pemakai ti manah, enda ngasuh nuan kaya.

¹⁸Orang ke jai ngasuh diri ditinggang pemerinsa ti deka dikena sida merinsaka orang ke menyana.

¹⁹Manah agi diau di menua puang ari ti diau begulai enggau bini ke ituk sereta selalu mutap.

²⁰Orang ke bepenemu-dalam diau kaya sereta nyamai, tang orang ke beli ngerua duit sida ngenyampat sida bulih duit nya.

²¹Anang enda nelap sereta betul ati, nya baru nuan deka panjai umur. Orang bukai deka bebasaka nuan, lalu manah enggau nuan.

²²Orang ke pintar ulih ngalahka nengeri ti dijaga bala orang ke kering, lalu ngerusak kuta ti dikena sida ngetanka diri.

²³Enti nuan enggai ke diri kena laban penusah, nuan enda tau enda bejimat nyebut utai.

²⁴Tunjukka ngagai aku orang ke sumbung, lalu aku deka nunjuk ke nuan orang ke tinggi ati, ti sumbung, ti enda nemu berundingka orang bukai.

²⁵Orang ke ngelusu, ke enggai gawa, semina munuh diri empu.

²⁶Sida semina berundingka utai ti dikinginka sida. Tang orang ke lurus, ulih meri utai enggau ati ti gerah mudah.

²⁷ TUHAN begedi lebuh orang ke jai meri Iya piring, lebih agi lebuh sida ngenjuk piring nya ngena juluk ati ti jai.

²⁸Saksi orang ke bula enda tau dikarapka, tang jaku orang ke berundingka pekara enggau silik, tau diterima.

²⁹Orang ke lurus andal ati ke diri empu, tang orang ke jai naka ulih pura-pura ngaga diri baka orang ke lurus.

³⁰Penemu-dalam, pemandai, penalam runding mensia enda ulih nulung nuan, enti TUHAN ngelaban nuan.

³¹Nuan tau nyendiaka kuda kena beperang, tang TUHAN ti ngasuh nuan menang.