Read Iban Jaku-dalam 22 Bible Online

Jaku-dalam 22 - Iban bible

Jaku-dalam 22

¹Pilih pemanah nama, ukai milih pengaya, lalu pilih pengasih, ukai milih pirak enggau emas.

²Orang ke kaya enggau orang ke seranta endang sebaka: seduai iya sama digaga TUHAN.

³Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.

⁴Upah orang ke baruh ati sereta nangika TUHAN nya pengaya, basa enggau umur ti panjai.

⁵Enti nuan sayauka nyawa diri, seliahka panjuk ti tau nyintak orang ke jai ba jalai raya.

⁶ Ajar anak mit jalai idup, nya baru sida deka ingatka ajar nya seumur idup.

⁷Orang ke seranta nyadi ulun orang ke kaya. Enti nuan nginjau duit, nuan nyadi ulun orang ke nyali nuan duit nya.

⁸Enti orang nanam atur ti enda lurus, iya deka ngetau penusah, lalu iya deka badu agi nekanka pengidup orang bukai.

⁹Orang ke gerah mudah magi pemakai sida enggau orang ke seranta, deka bulih berekat.

¹⁰Buru orang ke sumbung, nya baru penyarut, laya, enggau bejai pangan diri nadai agi.

¹¹Enti nuan rinduka ati ti tuchi, enggau jaku ti siru, nuan deka nyadi pangan raja.

¹²TUHAN deka nyaga penemu, tang Iya ngalahka jaku orang ke bula.

¹³Orang ke ngelusu diau di rumah, laban kenu ku sida, singa deka munuh sida enti sida pansut ke luar.

¹⁴Pengawa butang nya panjuk. Pengawa butang nyintak orang ke dikeringatka TUHAN.

¹⁵Anak mit endang selalu ngereja utai ti beli, sereta enda berunding, tang enti sida disipat, nya baru sida nemu ngubah ulah diri.

¹⁶Enti nuan meri pemeri ngagai orang ke kaya, tauka nekanka pengidup orang ke seranta kena nuan ngulihka pengaya, nuan empu deka suntuk.

¹⁷Pendingka aku, laban aku deka ngajar nuan utai ti udah disebut orang ke bepenemu-dalam. Peratika ajar sida,

¹⁸nya baru nuan deka gaga ati lebuh nuan ingatka ajar nya, lalu ulih nyebut ajar nya baru ngagai orang bukai.

¹⁹Aku ngasuh nuan manggaika pengarap nuan ba TUHAN. Nya kebuah aku ngajar utai nya ngagai nuan diatu.

²⁰Aku udah nuliska tiga puluh iti jaku ke nuan, ti ngundan penemu enggau jaku lalau ti manah,

²¹ti deka ngajar nuan utai ti dikumbai pemendar. Udah nya lebuh nuan diasuh ngiga pemendar nya, nuan deka pulai baru mai saut ti ngena.

²²Anang ngambi ulih ba orang ke seranta, ketegal iya seranta, tauka ngambi ulih ba orang ke nadai daya dalam kot,

²³laban TUHAN deka bejaku ngarika sida, lalu deka ngambi nyawa orang ke nguji ngambi nyawa sida.

²⁴Anang bepangan enggau orang ke lengkar sereta mangah,

²⁵enggai ke nuan dirampit ulah sida, lalu disintak panjuk.

²⁶Anang besemaya deka betanggungjawapka utang orang bukai,

²⁷enggai ke nuan enda ulih mayar utang nya, lalu sida deka ngambi peninduk nuan.

²⁸Anang nginsitka entara tanah ti udah diletak aki ini nuan.

²⁹Kati nuan bisi meda orang ke landik gawa? Iya deka bekereja ke raja; iya enda bekereja ke orang ke sengapa-dia.