Read Iban Jaku-dalam 23 Bible Online

Jaku-dalam 23 - Iban bible

Jaku-dalam 23

¹Lebuh nuan duduk makai enggau orang ke tinggi pangkat, peratika sapa orang nya.[27]

²Enti nuan bam makai, tagang diri.

³Anang tetengukka pemakai ti dienahka iya ngagai nuan, nyangka iya nguji nipu nuan.

⁴Anang ngelelakka diri ngiga pengaya, lalu patut nemu nagang diri.

⁵Duit nuan tau abis dalam sekejap mata aja, baka ke bisi sayap, lalu terebai baka burung menaul.

⁶Anang makai ba mija orang ke rangka, lalu anang tetengukka pemakai ti dienahka iya ngagai nuan.

⁷Ku orang nya bejaku, “Anang nagang diri. Nyengkau baru.” Tang nya ukai jaku ti bendar.

⁸Nuan deka mutahka semua utai ti udah diempa nuan, lalu semua jaku puji nuan deka tebasau ngapa.

⁹Anang bejaku ngagai orang ke beli, laban iya deka semina ngeleseka penemu nuan.

¹⁰Anang sekali-kali mindahka kelai entara tanah orang, tauka ngambi tanah orang ke nadai apai,

¹¹laban TUHAN ti bekuasa nyaga sida, lalu Iya deka bejaku ngarika sida ngelaban nuan.

¹²Pendingka pengajar nuan, lalu pelajarka utai enggau naka ulih nuan.

¹³Anang enda disiplin anak. Enti nuan nyipat iya,[28] nya enda munuh iya.

¹⁴Enti nuan nyipat iya, nya tau nyelamatka iya ari neraka.[29]

¹⁵Anak, enti nuan orang ke bepenemu-dalam, ati aku deka gaga amat.

¹⁶Aku deka temegah ati lebuh aku ninga nuan mansutka penemu-dalam.

¹⁷Anang ngining orang ke bedosa, tang awakka nuan seruran nangika TUHAN,

¹⁸nya baru nuan deka diau lantang jemah ila, lalu utai ti diadang nuan, enda lenyau.

¹⁹Pendingka jaku aku, anak. Anang enda bepenemu-dalam lalu berunding enggau manah ke jalai nuan idup.

²⁰Anang begulai enggau orang ke pengirup, ti bam,

²¹laban orang ke pemabuk enggau orang ke bam deka nyadi seranta. Enti nuan semina makai tinduk, enda lama da agi nuan deka begari ngena gari ti charik.

²²Pendingka apai nuan ke meri nuan pengidup, lalu anang ngeleseka indai nuan lebuh iya nyau tuai.

²³Beli pemendar, penemu-dalam, jaku ajar, enggau ati ti mereti, lalu anang nyual sida.

²⁴Apai orang ke lurus deka gaga ati; orang ke bisi anak ti pintar, deka gaga ati ke iya.

²⁵Awakka apai enggau indai nuan gaga ati ke nuan; asuh ati indai nuan lantang.

²⁶Anak, peratika enggau manah pengidup aku ngambika iya nyadika teladan nuan.

²⁷Indu sundal enggau indu ke ngereja kereja ti kamah nya lubang kebung ti dalam sereta sempit.

²⁸Sida ngipa nuan baka perumpak, lalu ngasuh mayuh lelaki enda tetap ati ngagai bini sida.

²⁹Tunjukka ngagai aku orang ke pengirup, ti enda tau enda ensepi ai bisa, nya baru aku deka nunjuk ke nuan orang ke merinsa, ke tusah ati ke diri empu, ke selalu ngaga pengachau, lalu selalu mutap. Mata sida mirah, lalu tubuh sida malui. Utai tu patut udah diseliahka sida.

³¹Anang nejuka wain nguji nuan, taja pen chura iya mirah-redam, lalu iya nyau beperenching dalam mangkuk, lalu nyamai diirup.

³²Pagi hari siti nuan asai ti udah dipantuk ular.

³³Mata nuan deka meda utai ti nyelai, lalu nuan enda ulih berunding tauka bejaku enggau terang.

³⁴Nuan deka asai ke ba tasik, asai ke betayun ngena tali layar.

³⁵Lalu ku nuan bejaku, “Nyangka aku udah dipalu orang. Aku tetap udah dipalu orang, tang aku enda ingat. Nama kebuah aku enda ulih dani? Aku deka ngirup baru.”