Read Iban Jaku-dalam 24 Bible Online

Jaku-dalam 24 - Iban bible

Jaku-dalam 24

¹Anang ngining orang ke jai, lalu anang bepangan enggau sida,

²laban sida semina berunding deka ngaga pengachau, lalu semua jaku sida ngenusahka orang.

³Ulih penemu-dalam, rumah digaga, lalu ulih pemereti ati, rumah didirika.

⁴Ulih penemu, bilik diisi enggau utai ti manah sereta berega.

⁵Orang ke bepenemu-dalam bekuasa agi ari orang ke kering, lalu orang ke bisi penemu bekuasa agi ari orang ke bisi pengering;

⁶laban ari iring penemu-dalam, kita ulih beperang, lalu ari iring bala penyanding penemu, kita deka menang.

⁷Jaku-dalam enda ulih diperatika orang ke beli. Sida nadai utai disebut lebuh orang berandauka pekara ti besai.

⁸Orang ke bekira deka ngereja penyai, deka dikumbai orang ke ngaga pengachau.

⁹Utai ti diperundingka orang ke beli, endang dosa magang, lalu orang ke sumbung dipegedika orang.

¹⁰Enti nuan lemi lebuh nuan dituntung penusah, reti nya nuan endang sigi amat lemi.

¹¹Anang kakang ati ngelepaska orang ke baru deka diukum bunuh, enti iya diakim ngena atur ti enda lurus.

¹²Nuan nyangka ngumbai utai nya ukai pekara nuan, tang Allah Taala nemu sereta ngakim ati nuan. Iya nengkilaka nuan, nya alai Iya nemu, lalu Iya deka ngupah nuan nitihka utai ti dikereja nuan.

¹³Anak, empa ai manyi, laban iya manah ke nuan. Ai manyi ti pansut ari idang manis ba dilah nuan.

¹⁴Baka nya mega, penemu-dalam manah ke semengat nuan. Giga penemu-dalam, nya baru pengidup nuan deka lantang senang jemah ila.

¹⁵Anang baka orang ke jai, ke bekira deka ngerumpak orang ke lurus ati, tauka ngerampas rumah sida.

¹⁶Orang ke lurus ati nyangka rebah tujuh kali, lalu sida angkat baru; tang orang ke jai deka alah laban penusah.

¹⁷Anang gaga ati lebuh munsuh kita rebah, lalu anang gaga ati lebuh sida tesangkut;

¹⁸enggai ke TUHAN meda nya, lalu Iya enda lantang ati ke nya, lalu enda nyadi ngukum sida.

¹⁹Anang irau ati ketegal orang ke jai, lalu anang ngining sida;

²⁰laban orang ke jai nadai penyadi, nadai utai diadang.

²¹Anak, anang enda nangika TUHAN sereta bebasaka raja. Anang bekaul enggau orang ke angkat ngelaban sida,

²²laban orang ke baka nya deka dirusak enggau ngenyit, lalu nadai orang nemu gaya pengerusak ti deka datai ari TUHAN enggau ari raja.

²³Tu jaku ari orang ke bepenemu-dalam: Anang bepilih mata lebuh ngakim orang.

²⁴Enti sida ngumbai orang ke bepenyalah nya nadai udah ngereja utai ti salah, sida deka kena sumpah, sereta dipegedika semua orang.

²⁵Tang hakim ke ngukum orang ke salah, deka diau lantang sereta nerima berekat.

²⁶Saut ti betul nandaka orang nya endang amat pangan ti bendar.

²⁷Sediaka pengawa nuan di luar, sediaka umai nuan; udah nya baru nuan nirika rumah.

²⁸Anang besaksi ngelaban pangan diri enggau nadai kebuah, lalu anang nipu orang.

²⁹Anang nyebut, “Aku deka ngereja ngagai orang utai ti udah dikereja sida ngagai aku! Aku deka malas!”

³⁰Aku bejalai nengah umai orang ke ngelusu, lalu nengah kebun anggur orang ke beli.

³¹Aku tepedaka umai enggau kebun nya penuh laban madang duri enggau babas. Dinding batu ti ngelingi umai enggau kebun nya udah runtuh.

³²Aku tepedaka utai nya, lalu berundingka iya; aku malik, lalu aku bulih pelajar ari nya.

³³ Enti nuan tinduk bekerendut dada enda lama, lalu belelak,

³⁴penyeranta deka nyerang nuan baka perumpak ke besenyata.