Read Iban Jaku-dalam 25 Bible Online

Jaku-dalam 25 - Iban bible

Jaku-dalam 25

¹Tu sekeda agi jaku-dalam ti disebut Solomon, ti ditulis bala pemesai raja Hesekiah di menua Judah.

²Kitai ngemesaika Allah Taala ketegal utai ti dilalaika Iya. Kitai bebasaka raja ketegal utai ti diterangka sida.

³Nuan nadai nemu utai ti diperundingka raja. Runding iya enda ulih diperagam kitai, baka peninggi langit tauka penalam tasik.

⁴Buai utai ti kamah ari pirak, nya baru tukang pirak ulih ngaga utai ti manah ari nya.

⁵Buai penyanding penemu raja ti jai, nya baru perintah iya deka bejalaika pengawa enggau lurus.

⁶ Lebuh nuan bediri di mua raja nuan patut ngemaruhka diri, lalu anang nguji ngaga diri baka orang ke tinggi pangkat.

⁷Manah agi diasuh orang niki ngagai endur ti tinggi, ari ke diasuh orang angkat ari endur nya awakka endur nya diberi ngagai orang ke tinggi agi pangkat.

⁸Anang kelalu jampat mai pekara ti dipeda nuan ngagai kot. Enti orang bukai nemu saksi nuan nya salah, nama utai ti deka dikereja nuan?

⁹Enti nuan beserekang penemu enggau orang ke berimbai pendiau enggau nuan, atur pekara nya enggau iya, lalu anang madahka resia nya ngagai orang bukai,

¹⁰enggai ke semua orang nemu nuan enda nemu nyimpan resia, lalu nuan deka malu seumur idup.

¹¹Penemu ti terang disebut sebaka enggau emas ti disangkumka enggau pirak.

¹²Jaku tangkan ti diberi orang ke bisi peneleba ngagai orang ke deka mending, berega agi ari tinchin emas tauka ari utai ti berega ti digaga ari emas ti pemadu tulin.

¹³Seruan ti tau dikarapka, ngerinduka ati orang ke ngasuh iya mai pesan, baka ai ti chelap lebuh hari angat lebuh maya ngetau.

¹⁴Orang ke besemaya deka meri utai, tang enda, nya baka mua hari enggau ribut ti nadai ngasuh hari ujan.

¹⁵Ati ti liat ulih nguingka ati penyakal ti pemadu kieh, lalu ulih nguingka ati bala orang ke merintah.

¹⁶Anang sekali-kali makai ai manyi lebih ari ti patut, laban enti nuan makai kelalu mayuh, ai manyi nya tau ngasuh nuan mutah.

¹⁷Anang kelalu suah nemuai ngagai orang ke berimbai pendiau enggau nuan, enggai ke sida leju meda nuan, lalu begedika nuan.

¹⁸Jaku dawa ti bula nya baka pedang, baka pemalu, tauka baka laja ti tajam.

¹⁹Ngarapka orang ke enda tau dikarapka lebuh maya penusah, nya baka orang ke nguji ngunyah utai ngena ngeli ti gerah, tauka bejalai ngena kaki ti enda ulih engkebut.

²⁰Enti nuan belagu di mua orang ke tusah ati nuan baka ke muka baju ari tubuh orang lebuh hari chelap, tauka baka ke nuang chuka ngagai telih iya.

²¹ Enti munsuh nuan lapar, beri sida makai. Enti sida aus, beri sida ai.

²²Nuan deka ngasuh sida malu, lalu TUHAN deka ngupah nuan.

²³Mulut ti chabul deka ngasuh orang ringat, baka ribut utara ti mai ujan.

²⁴Manah agi diau ba perabung rumah, ari ti diau dalam rumah begulai enggau bini ke ituk.

²⁵Nerima berita ari menua ti jauh nya baka ke ngirup ai chelap lebuh nuan rangkai aus.

²⁶Orang ke menyana, ti ngalahka diri lalu nurutka orang ke jai, nya baka mata ai ti kamah, tauka baka telaga ti udah diberi rachun.

²⁷Enti nuan makai kelalu mayuh ai manyi utai nya enda manah ke nuan, lalu baka nya mega enti nuan kelalu balat minta puji orang.[30]

²⁸Enti nuan enda ulih nagang diri ringat, nuan nadai daya, baka nengeri ti nadai kuta, ti mudah diserang munsuh.