Read Iban Jaku-dalam 26 Bible Online

Jaku-dalam 26 - Iban bible

Jaku-dalam 26

¹Jaku puji enggai nyadi disebut ba orang ke beli, baka seleju ti nadai kala labuh lebuh musin panas, tauka baka hari ujan lebuh maya ngetau.

²Jaku sumpah enda ulih ngemediska nuan, enti nuan endang enda patut disumpah. Jaku sumpah nya baka burung ti mansa terebai lalu nadai kala inggap.

³Nuan enda tau enda nyipat kuda. Nuan enda tau enda ngelekatka tali ba mulut keledai, lalu nuan enda tau enda malu orang ke beli.

⁴Enti nuan nyaut tanya ti beli, nuan sama beli baka orang ke mantaika tanya nya.

⁵Beri saut ti beli ngagai tanya ti beli. Nya baru orang ke mantaika tanya nya deka nemu diri enda pintar munyi ti disangka iya empu.

⁶Enti nuan ngasuh orang ke beli mai pesan, manah agi nuan netak kaki nuan empu, laban nuan minta penusah.

⁷Orang ke beli enda ulih ngena jaku ti dalam. Iya sebaka enggau orang ke kait-kupit ti enda ulih ngena kaki diri.

⁸Muji orang ke beli sigi nadai reti, baka ke nanchangka batu ba pangwang.

⁹Orang ke beli, ke besebutka jaku ti dalam reti, nya baka orang ke mabuk, ke nguji ngulihka duri ari jari diri.

¹⁰Orang ke ngupah orang ke beli lalu ngasuh iya bekereja lebuh iya mansa, semina ngemediska semua orang.[31]

¹¹ Orang ke beli ti ngereja utai ti enda menuku kedua kali, nya baka ukui ti pulai ngagai mutah diri empu.

¹²Orang ke pemadu beli nya manah agi ari orang ke ngumbai diri bepenemu-dalam, tang iya ti bendar iya ukai orang ke bepenemu-dalam.

¹³Nama kebuah orang ke ngelusu enda pansut ari rumah? Nama utai ti tau ngerampit sida? Kati sida takutka singa?

¹⁴Orang ke ngelusu singit ke kiba, singit ke kanan ba peninduk diri, baka pintu ti telenga tikup.

¹⁵Sekeda orang kelalu ngelusu, datai ke sida nyau enda tesuapka pemakai ke diri empu.

¹⁶Orang ke ngelusu deka ngumbai diri pintar agi ari tujuh iku orang ke nemu nerangka penemu diri.

¹⁷Enti nuan bekelikuh enggau orang pasal pekara orang bukai, nuan baka orang ke bejalai nengah jalai raya lalu musil pending ukui.

¹⁸Orang ke nipu orang bukai, lalu udah nya ngumbai diri semina betundi aja, nya baka orang ke gila ke bemain ngena senyata ti tajam.

²⁰Api padam enti nadai kayu. Enti orang nadai bejakuka pangan diri ari belakang, orang badu agi belaya.

²¹Arang ngasuh bara api majak menyadi. Kayu ngasuh api majak menyadi, lalu orang ke ngaga pengachau ngasuh kelikuh nadai nemu abis.

²²Chabul mulut nyamai amat asai! Naka meh pengingin kitai nelan iya!

²³Jaku ti manis ti dikena nuan ngelalaika runding diri nya baka chat ti alus ti dikena ngechat periuk tanah ti murah.

²⁴Orang ke pura-pura ngapa, ngelalaika ati diri ti begedi ngena jaku ti manis.

²⁵Jaku iya munyi ti manah, tang anang arapka iya, laban ati iya penuh laban pemenchi.

²⁶Iya nyangka nguji ngelalaika ati diri ti begedi, tang semua orang deka meda utai ti jai ti dikereja iya.

²⁷ Orang ke nan panjuk kena nyintak orang bukai, deka kena sintak panjuk diri empu. Orang ke ngasuh tanah tusur, deka ditinggang tanah nya.

²⁸Mulut ti bula begedika orang ke dikemulaka iya, lalu jaku ti manis semina mai pengerusak.