Read Iban Jaku-dalam 27 Bible Online

Jaku-dalam 27 - Iban bible

Jaku-dalam 27

¹ Anang temegah bejakuka pasal pagila, laban nuan enda nemu utai ti deka nyadi entara diatu enggau pagila.

²Awakka orang bukai muji nuan. Orang kampar pen tau meh muji nuan. Anang sekali-kali muji diri.

³Batu enggau pasir kurang agi berat enti dibandingka enggau penusah ti tau nyadi ketegal orang ke beli.

⁴Pengeringat nya utai ti jai sereta ngerusak, tang iya enda ulih dibandingka enggau ati ti kepapas.

⁵Manah agi ngerara orang enggau chara ti terang, ari ke nejuka iya ngumbai nuan enda ibuhka iya.

⁶Pangan nganu enggau ati ti manah, taja pen nuan pedis dianu sida. Tang bejaga nuan lebuh munsuh engkauk nuan!

⁷Lebuh nuan kenyang, nuan enggai nerima ai manyi, tang lebuh nuan lapar, indah pemakai ti pait deh asai ti manis.

⁸Orang ke jauh ari menua diri nya baka burung ti ninggalka sarang.

⁹Minyak wangi enggau minyak ti bebau rengut ngasuh ati nuan lantang agi, tang pengachau ngasuh ati nuan irau.[32]

¹⁰Anang enda ingatka pangan nuan, tauka pangan apai nuan. Enti nuan bisi penusah, anang minta tulung ari kaban belayan nuan. Orang ke berimbai pendiau enggau nuan ulih nulung nuan lebih agi ari kaban belayan nuan ti diau jauh ari nuan.

¹¹Nuan enda tau enda bepenemu-dalam, anak, nya baru aku deka lantang ati, lalu ulih nyaut semua orang ke nganu aku.

¹²Orang ke mereti deka meda penusah datai, lalu nyeliahka penusah nya, tang orang ke enda berunding deka tetempuhka penusah nya, lalu ngesalka nya.

¹³Barang sapa chukup beli lalu besemayaka betanggungjawapka utang orang bukai,[33] patut nejuka reta tengkira sida ditan nyadika gadai.

¹⁴Ngerak pangan diri enggau nyawa ti inggar lebuh pagi hari nya baka ke nyumpah iya.

¹⁵Bini ke ituk nya munyi teritik ai ujan.

¹⁶Baka ni ku nuan ulih nagang iya bejaku? Kati nuan bisi udah kala nagang ribut, tauka nguji ngenggam minyak?[34]

¹⁷Orang belajar ari pangan diri nya baka besi ti ngansah besi.

¹⁸Enti nuan ngintu kayu ara, nya baru nuan bisi buah ara diempa. Orang gaji ke ngintu tuan sida, deka dibasa.

¹⁹Baka nuan ke meda kelemayang mua diri ba ai, baka nya meh nuan meda diri empu dalam ati nuan.

²⁰Pengingin mensia nya baka dunya pemati, endang nadai sekat.

²¹Pemanah emas enggau pirak diabas ngena api. Pemanah orang pen ulih mega diabas.

²²Taja pen nuan malu orang ke beli setengah mati, enda meh nuan ulih ngasuh sida badu agi beli.

²³Intu raban bedus enggau raban jelu sapi nuan enggau naka ulih nuan,

²⁴laban pengaya enda ulih tan belama iya. Indah bansa deh enda ulih tan belama iya.

²⁵Rumput ba umai enggau ba munggu ditebas lalu digumpul nyadika pemakai jelu tupi lalu rumput dia ditejuka tumbuh baru.

²⁶Nuan tau ngaga kain ari bulu bedus nuan empu, lalu meli tanah ngena duit ari rega kambin nuan.

²⁷Kambin ti bukai deka meri ai tusu ngagai nuan enggau ngagai kita sebilik, enggau ngagai bala orang gaji nuan ti indu.