Read Iban Jaku-dalam 28 Bible Online

Jaku-dalam 28 - Iban bible

Jaku-dalam 28

¹Orang ke jai rari taja pen orang nadai begagaika sida, tang orang ke lurus ati, berani baka singa.

²Lebuh siti bansa bedosa, orang ke merintah sida deka seruran betukar. Tang bansa deka nyadi kering sereta tan, lebuh bansa nya diperintah bala tuai ti landik berunding sereta mereti.

³Orang ke megai kuasa, ke nekanka pengidup orang ke seranta nya baka ujan ti ngerusak utai ti ditanam.

⁴Enti nuan enda bebasaka adat, nuan setanah enggau orang ke jai. Tang enti nuan ngasika adat, nuan ngelaban orang ke jai.

⁵Orang ke jai enda meretika utai ti dikumbai atur ti lurus, tang orang ke nyembah TUHAN nemu reti atur nya.

⁶Manah agi nyadi orang ke seranta sereta betul ati, ari ke nyadi orang ke kaya tang ngembuan ati ti enda betul.

⁷Orang ke biak ke ngasika adat nya orang ke nemu berunding. Orang ke bepangan enggau orang ke nadai guna, ngemaluka apai indai sida.

⁸Enti nuan kaya ari nuan ke bepintaka duit ba utai ti dijual nuan, lalu ngambi ulih ba orang, pengaya nuan deka pulai baru ngagai orang bukai ke nemu siru enggau orang ke seranta.

⁹Enti nuan enda ngasika adat, Allah Taala deka ringat lalu enggai mendingka sampi nuan.

¹⁰Enti nuan nipu orang ke lurus ati, lalu mai iya ngereja penyai, nuan deka kena sintak panjuk nuan empu, tang orang ke nadai penyalah deka diberi upah ti besai.

¹¹Orang ke kaya ngumbai diri bepenemu-dalam, tang orang ke seranta, ti mereti, deka nemu sapa orang nya ke bendar.

¹²Lebuh orang ke lurus megai kuasa, semua orang lantang diau, tang lebuh orang ke jai merintah, orang belalai.

¹³Nuan enda ulih mujur dalam pengidup nuan, enti nuan nguji ngelalaika dosa diri. Tang enti nuan ngaku dosa diri lalu badu agi bedosa, nya baru Allah Taala deka kasihka nuan.

¹⁴Anang enda seruran ngasika TUHAN, nya baru nuan deka lantang diau, tang enti nuan kieh, nuan deka rusak.

¹⁵Orang ke seranta nadai daya ngelaban raja ti jai, laban raja nya mangah baka singa ti negung, tauka baka beruang ti segau-segau.

¹⁶Raja ti enda nemu berunding, jai enggau orang, tang raja ke begedika ati ti enda betul, deka lama merintah.

¹⁷Orang ke munuh orang endang numbak kubur ke diri empu enggau naka penyampat. Anang nguji nagang iya.

¹⁸Awakka ati nuan betul, nya baru nuan deka diau likun, tang enti ati nuan enda betul, nuan deka rebah enggau ngenyit.

¹⁹Orang bumai ke bagas, deka mayuh utai diempa, tang orang ke masau jam, deka seruran seranta.

²⁰Orang ke lurus ati, deka idup lantang senang, tang enti nuan deka jampat kaya, nuan deka kena ukum.

²¹Bepilih mata nya utai ti salah; tang sekeda hakim deka ngereja utai ti salah, kena sida makai suap ti pemadu mit.

²²Orang ke semina berundingka diri empu aja beguai-guai deka nyadi kaya datai ke sida nyau enda nemu diri deka ditinggang penyeranta.

²³Rara lalu ajar orang, lalu udah nya baru iya nemu begunaka jaku nya lebih agi ari jaku kelangkung.

²⁴Orang ke ngumbai diri enda salah ngenchuri utai ari apai indai diri, nya jai agi ari penchuri.

²⁵Semina berundingka diri empu aja deka nyungkak pengachau nyadi. Manah agi nuan manggaika pengarap nuan ba TUHAN.

²⁶Nuan beli enti nuan nitihka penemu diri, tang enti nuan nitihka ajar orang ke dalam agi penemu, nuan deka diau likun.

²⁷Beri utai ngagai orang ke seranta, nya baru nuan enda nemu suntuk, tang enti nuan nutup mata nuan ngagai orang ke seranta, mayuh orang deka nyumpah nuan.

²⁸Orang belalai lebuh orang ke jai angkat megai kuasa, tang lebuh sida dibuai ari kuasa, orang ke lurus deka merintah baru.