Read Iban Jaku-dalam 29 Bible Online

Jaku-dalam 29 - Iban bible

Jaku-dalam 29

¹Enti nuan majak kieh genap kali orang ngajar nuan, jemah ila nuan deka rusak lalu enda ulih angkat agi.

²Tunjukka siku pemerintah ke lurus, lalu aku deka nunjukka orang ke lantang diau. Tunjukka pemerintah ti jai, lalu aku deka nunjukka orang ke merinsa diau.

³Enti nuan nemu begunaka penemu-dalam, apai indai nuan deka temegahka nuan. Nuan beli enti nuan masau duit ba indu sundal.

⁴Lebuh raja keran deka ngeringka atur ti lurus, bansa deka kering, tang lebuh iya semina berundingka duit aja, iya deka ngerusak menua.

⁵Enti nuan pura-pura ngapa bejaku manis enggau pangan nuan, nuan semina nan panjuk kena nuan nyintak diri empu.[35]

⁶Orang ke jai disintak dosa sida empu, tang orang ke lurus ati diau lantang senang sereta nadai utai ngawa.

⁷Orang ke menyana nemu hak orang ke seranta, tang orang ke jai enda meretika utai nya.

⁸Orang ke enda berundingka orang bukai, tau ngasuh nengeri kachau, tang orang ke bepenemu-dalam ulih nagang pengachau nyadi.

⁹Lebuh orang ke pintar bechara ngelaban orang ke beli, orang ke beli nya semina ketawa aja, inggar sereta ngelese.

¹⁰Orang ke selalu deka bebunuhka orang begedika orang ke lurus ati, tang orang ke lurus deka nyaga[36] pengidup orang ke lurus ati.

¹¹Orang ke beli ngayanka pengeringat diri di mua orang mayuh, tang orang ke mereti, nemu liat ati lalu nagang diri ringat.

¹²Enti raja mendingka berita ti bula, semua bala pemesai iya deka nyadi orang ke bula.

¹³Orang ke seranta, enggau orang ke nekanka pengidup sida, sama diberi TUHAN mata.

¹⁴Enti raja nyaga hak orang ke seranta, iya deka lama nyadi raja.

¹⁵Sipat enggau jaku anu[37] meri penemu-dalam. Indai deka malu laban anak, enti indai nejuka anak enda disipat, enda dirara.

¹⁶Lebuh orang ke jai megai kuasa, pengawa ti jai deka betambah. Tang orang ke lurus deka meda orang ke jai rebah.

¹⁷Disiplin anak kita, nya baru kita seruran tau temegahka sida. Sida nadai kebuah ngasuh kita malu.

¹⁸Enti enda diiring Allah Taala,[38] mensia deka charut,[39] tang beberekat meh orang ke nitihka adat Allah Taala![40]

¹⁹ Nuan enda ulih ngerara orang gaji nuan semina ngena jaku aja. Sida nyangka meretika utai ti ku nuan, tang sida enggai mending.

²⁰Orang ke beli bisi agi pengadang ari orang ke bejaku enggau enda berunding.

²¹Enti nuan meri semua utai ti dipinta ulun nuan kenyau ari sida agi mit, jemah ila sida deka ngerampas semua utai nuan.[41]

²²Orang ke lengkar nyungkak orang balat belaya, sereta ngaga pengachau.

²³Ati ti sumbung deka ngasuh nuan rebah, tang enti nuan baruh ati, nuan deka dibasa orang.

²⁴Orang ke bekereja enggau penchuri, begedika diri empu. Iya deka diukum enti iya madahka utai ti bendar dalam kot, lalu enti iya enda, iya deka disumpah Allah Taala.

²⁵Enti nuan irauka jaku orang, nuan tusah diau, tang enti nuan manggaika pengarap nuan ba TUHAN, nuan deka likun.

²⁶Semua orang bela ingin minta diri nyadi pangan orang ke merintah, tang nuan semina tau bulih atur ti lurus ari TUHAN.

²⁷Orang ke lurus begedika orang ke jai, lalu orang ke jai begedika orang ke lurus.