Read Iban Jaku-dalam 3 Bible Online

Jaku-dalam 3 - Iban bible

Jaku-dalam 3

¹Anak, anang enda ingatka utai ti diajar aku ngagai nuan. Seruran kingatka utai ti diasuh aku kereja nuan.

²Jaku ajar ti diberi aku deka ngasuh nuan gayu-guru sereta nyadi kaya-raja.

³Anang ngelengkaka penaluk enggau penetap ati nuan. Tanchangka sida ba rekung nuan. Tuliska sida ba ati nuan.

⁴ Nya baru Allah Taala enggau mensia deka rinduka nuan.

⁵Panggaika diri ba TUHAN enggau pengabis ati nuan. Anang manggaika diri ba penemu diri empu.

⁶Awakka TUHAN seruran ngiring nuan, nya baru Iya deka nunjukka jalai ti ngena ngagai nuan.

⁷ Anang ngumbai diri pintar. Nangika TUHAN, lalu anang ngereja penyai.

⁸Nya baru Iya deka nyadi baka ubat ti manah, ti ngeraika telih nuan, lalu ngasuh nuan kurang agi pedis.

⁹Kemesaika TUHAN ngena piring ti pemadu manah ari asil umai nuan,

¹⁰nya baru bilik setor nuan deka penuh laban gandum, lalu nuan deka bulih wain lebih ari ti ulih disimpan nuan.

¹¹ Anak, lebuh TUHAN madahka penyalah nuan, dingaka Iya enggau manah, lalu ambi jaku Iya nyadika jaku tangkan.

¹² Allah Taala madahka penyalah orang ke dikerinduka Iya, baka apai indai ke madahka penyalah anak ke dikemegahka sida.

¹³Beberekat meh orang ke nyadi orang ke bepenemu-dalam, ke nemu meretika utai.

¹⁴Penguntung ari nya besai agi ari penguntung bulih pirak. Utai nya berega agi ari emas.

¹⁵Penemu-dalam berega agi ari batu ti berega. Nadai utai ti dikinginka nuan ulih dibandingka enggau nya.

¹⁶Penemu-dalam meri nuan umur ti panjai, pengaya enggau basa.

¹⁷Penemu-dalam tau ngasuh pendiau nuan lantang sereta likun seumur idup.

¹⁸Orang ke bepegai erat ba penemu-dalam deka diau lantang senang. Penemu-dalam deka meri sida pengidup.

¹⁹TUHAN ngaga dunya ngena penemu-dalam. Ngena penemu Iya, Iya ngengkahka langit ba endur iya.

²⁰Penemu-dalam ti dikembuan TUHAN ngasuh ai sungai rarat lalu ngasuh mua hari meri ai ujan ngagai tanah.

²¹Anak, bepegai erat ba penemu-dalam enggau ba penalam runding nuan. Anang nejuka sida ninggalka nuan.

²²Sida deka meri nuan pengidup, pengidup ti nyamai sereta lantang.

²³Nuan ulih bejalai enggau likun lalu enda tesangkut.

²⁴Nuan enda takut lebuh nuan deka tinduk, lalu nuan deka tinduk jenak sepemanjai malam.

²⁵Nuan enda ibuh irau ati ke penusah besai ti datai enggau ngenyit baka kabut ti nuntung orang ke jai.

²⁶TUHAN deka nyaga nuan likun. Iya enggai nejuka nuan disintak panjuk.

²⁷ Enggau naka ulih kereja utai ti manah ngagai orang ke begunaka utai nya.

²⁸Anang sekali-kali ngasuh orang ke berimbai pendiau enggau nuan, nganti ngagai pagila, enti nuan ulih nulung sida tekala nya.

²⁹Anang bekira deka ngereja utai ti tau ngemediska orang ke berimbai pendiau enggau nuan. Sida diau berimbai enggau nuan, laban sida arapka nuan.

³⁰Anang bekelikuh enggau nadai kebuah, enti orang nya nadai udah ngemediska nuan.

³¹Anang ngining pemangah orang, lalu anang diau nitihka jalai iya,

³²laban TUHAN begedika orang ke ngereja penyai, tang Iya ngaga orang ke lurus nyadika pangan Iya.

³³TUHAN nyumpah ruang bilik orang ke jai, tang merekatka ruang bilik orang ke lurus.

³⁴ Iya enda begunaka orang ke sumbung, tang Iya rinduka orang ke baruh ati.

³⁵Orang ke bepenemu-dalam deka dibasa orang, tang orang ke beli deka semina nambahka pemalu diri.