Read Iban Jaku-dalam 31 Bible Online

Jaku-dalam 31 - Iban bible

Jaku-dalam 31

¹Tu jaku ti disebut indai Raja Lemuel ngagai iya:

²“Nuan tu anak ke dikesayauka aku. Nuan tu meh saut ke sampi aku. Nama utai ti deka dipadahka aku ngagai nuan?

³Anang ngabiska tulang beleman, lalu anang ngabiska duit nuan ba indu. Sida udah ngerusak bala raja.

⁴Pendingka tu, Lemuel. Raja enda patut ngirup wain, tauka tetengukka ai ti bisa.

⁵Lebuh sida ngirup, sida enda ingatka adat, lalu enda ibuhka hak orang ke suntuk.

⁶Ai arak nya ungkup ke orang ke mati, ke orang ke merinsa diau.

⁷Awakka sida ngirup, lalu enda agi ingatka penyeranta enggau ati ti enda lantang idup.

⁸“Anang enda bejaku ngarika orang ke enda ulih ngarika diri empu. Jaga hak semua orang ke nadai daya.

⁹Bejaku ngarika sida, lalu nyadi hakim ke lurus. Jaga hak orang ke seranta, enggau ke suntuk.”

¹⁰Naka meh pemar ngiga bini ke nemu ngereja utai! Iya berega agi ari semua batu ti berega!

¹¹Laki iya ngarapka iya, lalu laki iya enda sekali-kali seranta diau.

¹²Seagi-agi iya idup, iya ngereja utai ti manah ke laki iya, lalu enda kala ngemediska iya.

¹³Iya seruran bekereja begagaka kain ari bulu bedus enggau ari linin.

¹⁴Iya mai pemakai ke rumah ari endur ti jauh, baka kapal ti dikena orang bedagang.

¹⁵Iya angkat sebedau rerak tawas, nyendiaka pemakai ke sida sebilik, lalu madahka bagi pengawa ngagai sida indu ke orang gaji iya.

¹⁶Iya meresa tanah, lalu meli tanah nya, lalu ngena duit ti ulih iya, iya numbuhka kebun anggur.

¹⁷Iya indu ke bagas, kering sereta rajin.

¹⁸Iya nemu rega semua utai ti digaga iya, lalu iya gawa jauh malam.

¹⁹Iya ngaga ubung ke diri empu, lalu nenun kain ke diri empu.

²⁰Iya gerah ati meri utai ngagai orang ke seranta enggau orang ke suntuk.

²¹Iya enda irau ati lebuh seleju nyadi, laban sida sebilik bisi gari kena ngintu tubuh diri angat.

²²Iya ngaga chadar tilam, lalu ngerasukka kain linin ti alus ti mirah-redam.

²³Laki iya endang dikelala orang, siku ari orang ke tinggi pangkat.

²⁴Iya ngaga gari enggau belulang, lalu nyual utai nya ngagai orang ke bedagang.

²⁵Iya regas, sereta dibasa orang, lalu iya enda takutka utai ti nyadi jemah ila.

²⁶Iya bejimat sereta pintar mansutka jaku.

²⁷Iya endang enda jenuh lalu seruran meratika utai ti dipeguna sida sebilik.

²⁸Bala anak iya beterima kasihka utai ti dikereja iya, lalu laki iya muji iya.

²⁹Ku laki iya, “Bini ti manah amat mayuh, tang nuan tu bini ke pemadu manah.”

³⁰Pemajik tau nipu, lalu pemanah gamal tau lenyau, tang indu ke nangika TUHAN patut dipuji.

³¹Puji meh iya ketegal semua utai ti dikereja iya. Iya endang patut dibasa semua orang.