Read Iban Jaku-dalam 5 Bible Online

Jaku-dalam 5 - Iban bible

Jaku-dalam 5

¹Anak, perati sereta pendingka penemu-dalam enggau runding ti dalam ti diberi aku.

²Nya baru nuan deka nemu chara ngatur ulah diri enggau menyana, lalu jaku nuan deka mandangka nuan bisi penemu.

³Mulut bini orang bukai nyangka manis baka ai manyi, lalu sium iya nyangka lichin baka minyak kana,

⁴tang lebuh utai nya udah lepas, iya nadai ninggalka utai bukai tang semina ati ti begedi enggau pemerinsa.

⁵Iya deka mai nuan nurun ngagai dunya pemati. Jalai ti ditengah iya nuju ngagai pemati.

⁶Iya enda niti jalai pengidup, tang limpang, lalu iya enda nemu utai ti nyadi.

⁷Nya alai pendingka aku, kita ke anak lelaki, lalu anang enda ingatka utai ti disebut aku.

⁸Kejangka diri jauh ari indu ke baka nya! Datai semak ngagai mua pintu iya deh kita enda tau!

⁹Enti kita datai semak ngagai indu ke baka nya, kita enda dibasa orang agi lalu kita deka mati biak dibunuh orang ke nadai pengasih.

¹⁰Orang kampar deka ngerampas semua pengaya kita, lalu utai ti udah ulih kita deka diempu orang bukai.

¹¹Kita deka gali bedemuh nganti diri ke mati. Isi enggau gumpal isi kita deka lupis,

¹²lalu kita deka bejaku munyi tu, “Nama kebuah aku enggai diajar? Nama kebuah aku enggai nejuka orang madahka aku salah?

¹³Aku enggai mendingka bala pengajar aku. Aku enggai mendingka sida.

¹⁴Lalu aku tekala nya nemu diri kena pechat di mua orang mayuh.”

¹⁵Irup ai ari telaga nuan empu, ai ti rarat ari letung nuan empu.

¹⁶Kati mata ai nuan patut diachirka ngagai menua bukai, lalu ai sungai nuan rarat ba sebelah jalai raya?

¹⁷Awakka sida diempu nuan siku aja, lalu ukai dipekunsika nuan enggau orang kampar.

¹⁸Nya alai nuan patut lantang ati diau enggau bini ke enggau nuan jadi,

¹⁹ti bajik sereta imun baka rusa. Awakka pemajik iya ngasuh nuan lantang. Awakka iya nyerayung nuan ngena pengerindu.

²⁰Anak, nama kebuah nuan rinduka indu bukai? Nama kebuah nuan inginka pemajik bini orang bukai?

²¹TUHAN meda semua utai ti dikereja nuan. Iya meda nuan di sebarang endur nuan bejalai.

²²Dosa orang ke jai nyadi panjuk. Sida disintak jarin dosa sida empu.

²³Sida mati laban sida enda nemu nagang diri. Pemeli sida empu ti munuh sida.