Read Iban Jaku-dalam 6 Bible Online

Jaku-dalam 6 - Iban bible

Jaku-dalam 6

¹ Anak, kati nuan bisi udah besemaya deka betanggungjawapka utang orang bukai?

²Kati nuan bisi udah kala kena sintak jaku nuan empu, tauka disintak semaya nuan empu?

³Anak, enti nuan udah kala, nuan dipanjuk kuasa orang nya, tang tu jalai nuan mansutka diri ari nya: mansang nuan enggau jampat ngagai orang nya lalu minta iya ngelepaska nuan.

⁴Anang tinduk, tauka ngetu lalu belelak.

⁵Lepaska diri ari panjuk nya, baka burung tauka rusa ti rari ari orang ke ngasu.

⁶Orang ke ngelusu patut beratika chara semut idup.

⁷Sida nadai kepala, nadai pengulu, nadai raja,

⁸tang sida besimpanka pemakai lebuh musin panas, nyendiaka bekal nyadika penabat musin chelap.

⁹Ni pengelama orang ke ngelusu deka majak gali? Kemaya iya deka angkat?

¹⁰ Ku iya bejaku, “Aku deka tinduk enda lama. Aku deka bekerendut dada lalu belelak enda lama.”

¹¹Tang lebuh iya tinduk, penyeranta datai nyerang iya, baka perumpak ke besenyata.

¹²Orang ke nadai guna, orang ke jai, bejalai segau-segau nusui pemula.

¹³ Sida ngichekka mata, lalu ngaga tanda ngagai pangan diri deka nipu nuan.

¹⁴Sekumbang sida ke ngereja nya, sida berunding deka ngereja penyai, nyungkak pengachau nyadi di semua endur.

¹⁵Ketegal nya, penusah ti besai deka nuntung sida lebuh sida enda ngadang, lalu sida deka bakal lalu mati.

¹⁶Tu tujuh bengkah utai ti dipegedika TUHAN, ti enda ulih ditatka Iya: pendiau ti sumbung, dilah ti bula, jari ti munuh orang ke nadai penyalah, ati ti berundingka akal ti jai, kaki ti beguai bejalaika ngereja penyai, orang ke seruran besaksi bula enggau orang ke nyungkak pengachau nyadi entara pangan.

²⁰Anak, kereja utai ti diasuh apai nuan, lalu anang enda ingatka utai ti udah diajar indai nuan.

²¹Kingatka jaku seduai iya dalam ati nuan.

²²Jaku ajar seduai iya deka nguluka nuan lebuh nuan bejalai, nyaga nuan lebuh malam hari, lalu meri nuan jaku lalau lebuh siang hari.

²³Atur ti diberi seduai iya nya penampak ti manchar. Jaku rara seduai iya ulih ngajar nuan jalai pengidup.

²⁴Jaku nya ulih nyaga nuan ari indu ke jai, ari jaku ti manis ti disebut bini orang bukai.

²⁵Anang alah diuji pemajik sida. Anang alah dipanjuk jeling mata sida.

²⁶Lelaki ulih meli indu sundal ngena setuku roti, tang pengawa butang deka ngabiska semua reta iya.

²⁷Kati nuan ulih merap bara api, lalu gari nuan enda angus?

²⁸Kati nuan ulih bejalai ngindik bara api, lalu kaki nuan enda betu?

²⁹Baka nya meh pemesai penusah enti nuan tinduk enggau bini orang. Barang sapa ngereja nya, deka dituntung penusah.

³⁰Orang enda mechat penchuri ke lapar enti iya ngenchuri pemakai.

³¹Tang enti iya kena tangkap, iya enda tau enda mayar tujuh kali lipat utai ti dichuri iya, lalu iya enda tau enda nyerahka semua reta tengkira iya.

³²Tang lelaki ke butang endang sigi enda nemu berunding. Iya semina ngerusak diri empu.

³³Iya enda dibasa agi, lalu iya deka dipalu, lalu dipechat belama iya.

³⁴Laki pengabis udu ringat lebuh iya ninding, lalu iya malas enggau nadai besekat.

³⁵Iya enggai nerima bayar. Ngemayuh ni pen utai diberi ngagai iya, enggai meh iya badu ringat.